Ինչպես տեղեկացրել ենք, ՀՀ ԱԺ պատգամավորներին թույլ չեն տվել տեսակցել «Նուբարաշեն» քրեակատարողական հիմնարկում գտնվող կալանավորներին:
Մասնավորապես այսօր թույլ չեն տվել ԲՀԿ-ական պատգամավորներին, որոնք գնացել էին տեսակցելու Արմեն Մարտիրոսյանին, Դավիթ Սանասարյանին, ինչպես նաեւ մի քանի այլ կալանավորված անձանց, երեկ նույն արգելքը դրվել է Էդմոն Մարուքյանի առաջ: Նիկոլ Փաշինյանը ևս ֆեյսբուքյան ուղիղ եթերով տեղեկացրել է, որ այսօր իրեն ևս ոչ միայն արգելել են տեսակցել «Սասնա ծռեր» խմբի անդամների և այդ գործի հետ կապված մյուս անձանց, այլև իրեն հնարավորություն չի տրվել անարգել շարժվել քրեակատարողական հիմնարկում:
Պատգամավորները հղում են կատարում օրենսդրությանը` համապատասխան որի` պատգամավորների մուտքը քրեակատարողական հիմնարկ թույլատրվում է: Մինչդեռ նրանց` կալանավորների հետ տեսակցությունն արգելում են` պատճառաբանելով, թե քննիչն է նման որոշում կայացրել: Նաիրա Զոհրաբյանն այս հիմնավորումն անօրինական է համարում:
ՀՀ ԱՆ քրեակատարողական հիմնարկների վարչության մամուլի պատասխանատու Գոռ Ղլեչյանը Aravot.am-ի հետ զրույցում ուշադրություն հրավիրեց այն հանգամանքի վրա, որ օրենքի համաձայն` պատգամավորներին թույլատրվում է մուտք գործել ՔԿՀ, ինչը և նրանց այժմ չի արգելվում: Մյուս հարցերի պարզաբանման համար նա հորդորեց դիմել ՀՀ արդարադատության նախարարության լրատվական ծառայություն:
Կարդացեք նաև
Այստեղից կրկին նույն պատճառաբանությունը ներկայացրին, թե պատգամավորների` կալանավորների հետ հանդիպումն արգելվել է քննիչի որոշման հիման վրա:
Մեզ հետ զրույցում Նաիրա Զոհրաբյանն ահազանգել էր, որ զանգվածային անկարգությունների հրահրման գործով կալանավորված Տիգրան Մարգարյանին քրեակատարողական հիմնարկում պահելը «նոնսենս» է, քանի որ նրա մայրը ներկայացրել է փաստաթղթերի մի հսկայական փաթեթ՝ իր որդու մի շարք լուրջ հիվանդությունների մասին:
ՀՀ ԱՆ լրատվական ծառայությունից տեղեկացրին, որ Տիգրան Մարգարյանին բժիշկը զննել է, նա գանգատներ չի ունեցել, ստացիոնար բուժման կարիք չունի: Իսկ տեսակցությունների վերաբերյալ ևս մեկ անգամ շեշտեցին. «քննիչը թույլ կտա, տեսակցություն կլինի»:
Տաթև ՀԱՐՈՒԹՅՈՒՆՅԱՆ
