Օգոստոսի 8-ին Բաքվում կայացան եռակողմ բանակցություններ Ռուսաստանի, Իրանի եւ Ադրբեջանի միջեւ: Օգոստոսի 9-ին Սանկտ Պետերբուրգ ժամանեց Թուրքիայի նախագահը Էրդողանը, իսկ ՀՀ նախագահ Սերժ Սարգսյանը ՌԴ նախագահ Վլադիմիր Պուտինի հրավերով օգոստոսի 10-ին աշխատանքային այցով մեկնեց Մոսկվա։ Սարգսյան-Պուտին հանդիպումից առաջ ռուսաստանյան «Նովոստի» պետական լրատվական գործակալությունը վերլուծական հոդվածում նկատել է, որ Հայաստանում իրավիճակը բարդ է, որ հայկական որոշ ընդդիմադիր կուսակցություններ ֆինանսավորվում են Արեւմուտքից եւ մտադիր են տապալել գործող իշխանություններին։
Ինչպես հաղորդում է «Ազատություն» ռ/կ-ն, հոդվածի հեղինակի կարծիքով` ԼՂ հակամարտությունը հայտնվել է գերտերությունների հետաքրքրությունների խաչմերուկում։ «Այն վճռականությունը, որ ցուցաբերել է Սերժ Սարգսյանը ոստիկանության ՊՊԾ գնդի տարածքի գրավման հարցում, թույլ է տալիս հուսալ, որ Սարգսյանը պատրաստ է երկրի տնտեսության հարցերում լուրջ քայլերի գնալ եւ մտադիր է Պուտինին փոխանցել կոնկրետ առաջարկներ, սակայն Պուտին-Սարգսյան հանդիպման առանցքային հարցը Ղարաբաղն է լինելու»,- գրում է հոդվածագիրը` հավելելով, թե ապրիլյան քառօրյա պատերազմից հետո Պուտինը դարձել է Ադրբեջանի եւ Հայաստանի միջեւ միակ հեղինակավոր միջնորդը, եւ Վաշինգտոնին սա դուր չի եկել. «Դրա համար Արեւմուտքը կազմակերպել է ՊՊԾ գնդի տարածքի գրավումը Հայաստանում, որի նպատակն էր տապալել Ալիեւի եւ Սարգսյանի միջեւ նախնական պայմանավորվածությունները»։
Թեմայի մանրամասները
«Առավոտ», 11.08.2016
