Հայաստանում և սփյուռքում ապրող մի շարք մտավորականներ ստորագրահավաք են կազմակերպել change.org կայքում՝ կոչ անելով Հայաստանի իշխանություններին փոփոխություններ ձեռնարկել արդարադատության և մարդու իրավունքների ոլորտներում:
«Մարդու իրավունքների և քաղաքացիական ոլորտում բռնությունների աճի հետևանքով տարիներ շարունակվող բողոքի ցույցերից և 2016թ. գարնանն ու ամռանը տեղի ունեցած խռովություններից հետո մենք ոչ ենք ասում կոռուպցիային, մենիշխանությանը, դատական անհավասարությանը, ոստիկանության դաժանություններին, կուսակցություններին կառչած քաղաքական գործիչներին, անհավասար իրավունքներին, ազգային բնակչության կրճատմանը, կեղծված ընտրություններին, որոնցից յուրաքանչյուրը հանգեցնում է շարունակական անհնազանդությունների»,- ասվում է միջնորդագրի տեքստում:
Ստորագրահավաքի նախաձեռնողները կոչ են անում իշխանություններին երկրում պայմաններ ստեղծել «մարդկանց հավասարության, մարդու հիմնարար իրավունքների պաշտպանության, ազնիվ և թափանցիկ ընտրությունների, օրենքի նկատմամբ հարգանքի, ազնիվ աշխատավարձերի, իշխանության տարանջատման, մամուլի ազատության, ժողովրդավարական փոփոխությունների» համար:
Միջնորդագրի նախձեռնողների թվում են աշխարհահռչակ երաժիշտ Սերժ Թանգյանը, դերասան Վահե Բերբերյանը, Reddit-ի համահիմնադիր Ալեքսիս Օհանյանը, ռեժիսոր Ատոմ Էգոյանը, գրող Քրիս Բոհջալյանը, երաժիշտ Սեբուհ Սիմոնյանը, դերասանուհի Արսինե Խանջյանը, ռեժիսոր Սերժ Ավեդիքյանը, լրագրող Վիգեն Չեթերյանը և այլք:
Միջնորդագիրը բաց է և դրա տակ կարող են ստորագրել բոլորը:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
