Այսօր նշվեց Գյումրիի տոնը՝ մշակութային բազմաթիվ միջոցառումներով, պարարվեստի նորակառույց շենքի, Քըրք Քըրքորյանի անվան փողոցի, այստեղ գտնվող երիտասարդական պալատի բացմամբ, հացի և արհեստների փառատոնով։
Նշենք, որ Գյումրու ամենահետաքրքիր փողոցներից մեկը՝ Աբովյանի անվան փողոցը նորոգելուց հետո վերանվանեցին բարերար Քըրք Քըրքորյանի անվամբ։ Այս փողոցը նախկինում կոչվել է Ալեքսանդրովսկի․ կարելի է ասել, որ այս փողոցի յուրաքանչյուր շենք ունի իր պատմությունը․ այստեղ գտնվել է «Պադվալի Վաղոյի» տունը, Գյումրվա հին բաղնիքը, ֆրանսիական հյուրանոցը, ԿԳԲ-ի ու դատախազության շենքերը, որոնք պատմաճարտարապետական մեծ արժեք են ներկայացնում, «Հոկտեմբեր» կինոթատրոնը․․․
Լեզվաբան Մարիետա Խաչատրյանի դիտարկմամբ, ազգային բարերար Քըրք Քըքրոյանին կարելի էր մեծարել Գյումրու մեկ այլ փողոց նրա անվամբ կոչելով, ոչ թե մեր ազգային մեծի՝ Աբովյանի փողոցը հանիրավի հանելով։ Այս քայլը, ըստ լեզվաբանի, արդարացի չէ։
«Եթե կան այնպիսի մարդիկ, որոնց հանրագիտարաններ քրքրելով պիտի ճանաչենք, թողնել նրանց անվամբ փողոցներ և Աբովյանի անունը դնել վիճարկման սեղանին, համարում եմ անթույլատրելի»,- ասաց Մարիետա Խաչատրյանը։
Կարդացեք նաև
Քիչ հետո Գյումրու «Սև Բերդ» ամրոցի համերգասրահում կսկսվի միջազգային ռոք-ֆեստ փառատոնը, որին կմասնակցեն 10 ռոք խմբեր՝ ԱՄՆ-ից, Վրաստանից եւ այլն:
Նունե ԱՐԵՎՇԱՏՅԱՆ
