Հունվարի ութին Մուսալեռում գազի արտահոսքից ամուսնու եւ երեխայի հետ մահացած Աննա Միսակյանը էքստրասենս Անի Մաջնունյանի սպանության գործով (Աննա Միսակյանի քրոջ «ֆեյսբուքյան» էջի հրապարակումներից պարզ է դառնում, որ մահացած Աննան հենց տվյալ գործով որպես վկա անցնող Աննա Միսակյանն է,-խմբ.) պետք է կրկին հարցաքննվեր:
Ավելի վաղ հայտնել էինք, որ տուժող կողմը պատրաստվում էր առաջիկայում նման միջնորդություն ներկայացնել, քանի որ որոշակի հարցեր էին առաջացել:
Հիշեցնենք, որ Աննա Միսակյանն այս գործով առանցքային վկա էր համարվում, քանի որ դեպքի ժամանակ, ինչպես ինքն էր ասել դատարանում, եղել էր մեղադրյալ Մուշեղ Մխիթարյանի հետ եւ տեսել, թե ինչպես է «արնաքամ լինում Անի Մաջնունյանը»:
Թե վկայի մահվան դեպքում ի՞նչ ընթացք է ստանալու դատաքննությունը, գործով տուժողի իրավահաջորդ ճանաչված՝ Անի Մաջնունյանի մոր շահերի ներկայացուցիչը՝ փաստաբան Թամարա Բաղդասարյանը մեզ հետ զրույցում պարզաբանեց. «Նա այս պահին գործով վկա է: Եթե ունենար դատավարական այլ կարգավիճակ, օրինակ՝ մեղադրյալի, գործը կկարճվեր՝ վերջինիս մահվան փաստով: Բայց նա արդեն դատարանում ցուցմունք տվել է, որի հիման վրա էլ դատարանը կգնահատի. եթե արժանահավատ գտնի՝ այն կդրվի դատական ակտի հիմքում»:
Կարդացեք նաև
Թամարա Բաղդասարյանն անդրադառնալով էքստրասենսի սպանության գործի քննության ներկայիս փուլին՝ հայտնեց, որ մեղադրյալ Մուշեղ Մխիթարյանի հանդեպ վերջինիս միջնորդությամբ դատահոգեբուժական փորձաքննություն է նշանակվել. «Սպասում ենք համապատասխան եզրակացությանը, որպեսզի շարունակենք դատաքննությունը: Ապացույցների հետազոտման փուլում ենք»:
Լուիզա ՍՈՒՔԻԱՍՅԱՆ
