«Թուրքիայում ականատես ենք էական գործընթացների փոփոխության: Օբամայի վարչակարգի ընթացքում Թուրքիայի հետ հարաբերությունները լարված էին: Թուրքիան ակնկալում էր Գյուլենի արտահանձնման հետ կապված արձագանք, որը չեղավ»,-«Նովոստի Արմենիա» մամուլի կենտրոնում այսօր լրագրողների հետ հանդիպմանն ասաց ԱԺ պատգամավոր, «Եվրոպական ինտեգրացիա» ՀԿ–ի ղեկավար Կարեն Բեքարյանը:
«Էրդողանն ակնկալում է ԱՄՆ-ի հետ իրենց օրակարգի դինամիկ փոփոխություն եւ ցանկանում է Թրամփի հետ հանդիպել հնարավորինս շուտ, որպեսզի այդպես իրավիճակներ շտկի»,-նկատեց նա:
Անդրադառնալով Սիրիական հակամարտությանը Թուրքիայի ներգրավվածությանը, Բեքարյանը նշեց՝ եթե Արեւմուտքի համար Իրաքի եւ Սիրիայի քրդական ուժերը համարվում են դաշնակից, ապա Թուրքիան այս հարցում վերապահումներ ունի:
Կարեն Բեքարյանը հիշեցրեց, որ Թուրքիայի հետ ԵՄ-ն մեծ ու փոքր խնդիրներ ունի, այդ թվում՝ միգրացիոն ճգնաժամը. «Խնդիրների թվում է Թուրքիայում սպասվելիք սահմանադրական փոփոխությունների հանրաքվեն, որը Եվրոպայում դիտարկում են որպես նահանջ ժողովրդավարությունից: էրդողանը նոր Սահմանադրության է գնում՝ իր իսկ լիազորությունները մեծացնելու համար»: Պատգամավորը Թուրքիայի ներքին խնդիրների թվում առանձնացրեց նաեւ այն, որ իշխանությունն անհամաչափ ուժ է կիրառում լրատվամիջոցների, քաղհասարակության, ընդդիմության հանդեպ:
Կարդացեք նաև
Ինչ վերաբերում է թուրք-ռուսական հարաբերություններին, ապա ըստ Կարեն Բեքարյանի՝ գործակցության դաշտն ընդլայնելու հնարավորություններ կան:
Թե ինչպիսին կլինի այս ամենի ազդեցությունը Թուրքիայի անմիջական հարեւան Հայաստանի համար, պատգամավորի խոսքով. «Էական անկայունություն է, գործընթացների սցենարները սահմանափակ չեն: Մենք մտնում ենք նախընտրական փուլ, բայց արտաքին քաղաքականության ներքո մեզ համար էական կայունության անհրաժեշտություն կա»:
Լուիզա ՍՈՒՔԻԱՍՅԱՆ
