Վարչապետ Կարեն Կարապետյանն այսօր այցելեց Գյումրի: Նա նախ եղավ «Շիրակ» օդանավակայանում, որտեղ նրան դիմավորելու էին եկել բազմաթիվ պաշտոնյաներ, գործարարներ: Չնայած սառնամանիքին՝ նրանք դողալով կանգնել էին դրսում՝ րոպե առ րոպե սպասելով ուշացող վարչապետին: Նկատենք, որ վարչապետի հետ հանդիպման էին եկել ՀՀԿ Շիրակի մարզի վարկանիշային ցուցակը գլխավորող թեկնածուներից շատերը:
Կարեն Կարապետյանը շրջեց օդանավակայանում, ուսումնասիրեց պայմանները,, այնուհետ եղավ ածիկի դեռ շահագործման չհանձնված գործարանում ու հետո ոտքով շրջագայեց Գյումրու պատմական, «Կումայրի» արգելոց թանգարանի տարածքում գտնվող սրճարաններում ու փողոցներում: Վարչապետը պատահաբար բացում էր սրճարանների դռները ու ներս մտնում, նա եղավ նաեւ Իտալիայի պատվո հյուպատոսի՝ Անտոնիո Մոնտալտոյի «Վիլլա Կարս» հյուրատանը, որտեղ նույնպես պահպանված էր Գյումրու կոլորիտը: Ինչպես հայտնի է՝ Կարեն Կարապետյանի ընտանիքը պատրաստվում է իր անձնական միջոցներից գումարներ ներդնելու Գյումրիում՝ այս քաղաքը տուրիզմի կենտրոն դարձնելու, «Կումայրի» արգելոցի մեջ գտնվող երկու՝ Շիրազի ու Ռուսթավելի փողոցները վերականգնելու:
Կարդացեք նաև
Վարչապետին ուղեկցող մարդիկ նույնպես հիացած քայլում էին Գյումրու փողոցներով՝ մեզ խնդրելով ներկայացնել յուրաքանչյուր փողոցն ու այնտեղ գտնվող հին կառույցների պատմությունը: Ի դեպ, այսօր Կարեն Կարապետյանի համար էքսկուրսավարի դեր էր կատարում Գյումրու քաղաքապետ Սամվել Բալասանյանը: Քայլելով Շիրազի փողոցով՝ վարչապետը բացականչեց. «ֆանտաստիկ փողոց է», իսկ Քըրք Քըրքրյանի անվան փողոցով քայլելիս՝ վարչապետին ուղեկցող անձինք չէին ուզում հեռանալ:
Կարեն Կարապետյանի վերջին կանգառը Գյումրու տեխնոլոգիական կենտրոնն էր, նա ոտքով հասավ այստեղ ու բազմաթիվ գործարարների հետ քննարկեց Գյումրու զարգացման ներդրումային ծրագիրը: Գործարարներից շատերը, այդ թվում եւ սփյուռքահայեր, խոստացան մասնակցություն ունենալ Գյումրիում տուրիզմի ու գործարար միջավայրի ձեւավորմանը: Կառավարության ղեկավարը հայտարարեց, որ ինքը, ցավոք, ժամանակ չունի բիզնեսով զբաղվելու, սակայն Գյումրիում ներդրումներ կանեն իր ընտանիքի անդամները եւ մեծ պատիվ համարեց հրաշալի այս քաղաքում ներդրում անելը:
10 միլիոն ներդրում կկատարվի «Շիրակ» օդանավակայանում, իսկ 200 միլիոն դոլարի՝ «Կումայրի» արգելոցում: Մանրամասները քիչ անց:
Նունե ԱՐԵՎՇԱՏՅԱՆ
