«Ժառանգություն» կուսակցության առաջնորդ Րաֆֆի Հովհաննիսյանն այսօր նախքան կուսակցության ընդլայնված կազմով նիստի սկսվելը չի բացառել, որ խորհրդարանական ընտրությունների մասնակցության ձեւաչափի վերաբերյալ վերջնական որոշում չկայացվի՝ հաշվի առնելով կուսակցությունում այդ հարցի շուրջ տարաձայնությունները:
Նրա խոսքով, վեճերն իրենց կուսակցությունում շատ բուռն են լինում. «Նույն Անահիտը մնում է Անահիտ, նույն Ստյոպիկը մնում է Ստյոպիկ, ուղղակի իրենց քաղաքական դիրքորոշումն է այդպիսին: Մեզ մոտ եղել է անհատականությանը թեւեր տալու սովորությունը, իսկ որ թեւեր ես տալիս՝ դժվար է դրանք հետ վերցնելը:
Մեր կուսակցության առանցքային դեմքերից երկուսը որոշել են գնալ մի դաշինք, որի թիվ մեկ քննադատն էին ժամանակին: Ամեն ինչ հնարավոր է այս կյանքում, պետք չէ զարմանալ: Ով ուզում է ծառայել, ով ուզում է երախտագետ լինել, ով ապերախտ, ես ինքս այս խաղը երկար չեմ վարի»:
Պարոն Հովհաննիսյանը նաեւ բոլոր դաշինքներին եւ ընտրություններին մասնակից քաղաքական ուժերին հաջողություն մաղթեց. «Անհավասար պայքար է, եւ ամեն ինչ պետք է անենք, որ մենք էլ մեր լուման դնենք, որ այնպիսի ընտրություններ լինեն, ինչպիսին 25 տարիների ընթացքում Հայաստանը չի ունեցել»:
Կարդացեք նաև
Արփինե ՍԻՄՈՆՅԱՆ
