«Ադրբեջանը կարծես փորձում է ՀՀ-ի հետ մրցավազքի մեջ մտնել՝ Իրանի հետ հարաբերությունների զարգացման համատեքստում»,-ասում է իրանագետը
Մամուլում տեղեկություններ կան, որ մայիսին Ադրբեջանի նախագահ Իլհամ Ալիեւն այցելելու է Իրան, իսկ մարտին՝ Ռուսաստան: Այս առնչությամբ իրանագետ Վարդան Ոսկանյանը նշեց՝ թեեւ այցերի մասին հստակ տեղեկություններ դեռ չկան, սակայն Ալիեւի՝ հատկապես Իրանի նախագահ Հասան Ռոհաննի հետ անպայման հանդիպելու ձգտումը պայմանավորված է հետեւյալ հանգամանքով. նա փորձում է այդպես լուծել ՀՀ-ից «հետ չմնալու խնդիրը»: «Ադրբեջանական քարոզչամեքենան իր բնակչությանը եւս պարբերաբար հրամցնում է, թե Ադրբեջան-Իրան հարաբերություններում իրենք շատ ավելի առաջ են անցել ՀՀ-Իրան հարաբերություններից, մինչդեռ իրականությունն այլ է»,-մեզ հետ զրույցում նկատեց Վարդան Ոսկանյանը:
Նրա գնահատմամբ՝ Ադրբեջանը կարծես փորձում է ՀՀ-ի հետ մրցավազքի մեջ մտնել՝ Իրանի հետ հարաբերությունների զարգացման համատեքստում. «Սա ինչ-որ առումով դրական է, որովհետեւ ստացվում է, որ մենք ենք օրակարգ թելադրում Ադրբեջանին: Իրանը տարածաշրջանային գերտերություն է, որի հետ ՀՀ-ի առանձնահատուկ հարաբերությունները բխում են մեր եւ Իրանի շահերից»:
Կարդացեք նաև
Վարդան Ոսկանյանը հիշեցրեց, որ հատկապես վերջին շրջանում Ալիեւն անմիտ գործողություններով կարողացել է բավականին մեծ հետքայլ արձանագրել Իրանի հետ հարաբերությունների թվացյալ բարելավումից:
Իրանագետն անդրադարձավ նաեւ տեղեկություններին, թե նշյալ այցերի ընթացքում նախատեսվում է քննարկել Իրան-Ադրբեջան-ՌԴ նոր եռակողմ գագաթաժողովի կազմակերպման հարցը: Հետաքրքրվեցինք՝ որքանո՞վ է իրատեսական այդ ձեւաչափի «ռեստարտը»:
«Ադրբեջանում ընթացող յուրաքանչյուր գործընթացի պետք է հետեւենք, բայց չպետք է դա դարձնենք օրակարգային անմիջական խնդիր: Եթե հիշում եք՝ 2016թ. օգոստոսին Բաքվում կայացած եռակողմ՝ Իրան-Ադրբեջան-Ռուսաստան հանդիպումից հետո էլ անհիմն մտահոգություններ կային, թե Ռուսաստանը, Իրանն ու Ադրբեջանը ձեւավորում են հնարավոր դաշինք, ինչը տեղի չունեցավ: Նշեցիք «ռեստարտ» բառը: Տվյալ դեպքում, եթե անգամ «ռեստարտ»-ի կարիք կա, տեղի է ունեցել «ֆալցստարտ»,-նշեց Վարդան Ոսկանյանը:
Լուիզա ՍՈՒՔԻԱՍՅԱՆ
