Եզդիների համայնքի ներկայացուցիչները վրդովված են, որ ՀՀԿ-ն որպես պատգամավորի թեկնածու է ներկայացրել քրդերի, ոչ թե եզդիների:
«Զարկերակ» մամուլի ակումբում լրագրողների հետ հանդիպմանն այս կապակցությամբ մանրամասներ ներկայացրեց Մասիսի եզդիների միության նախագահ Քյարամ Սլոյանը և վրդովվեց. «Քուրդ-եզդին իրավունք չունի գա մեզի պատգամավոր դառնա: Ինքը մեր ազգի թշնամին է: ՀՀԿ-ն ներկայացրել է քրդամետ Ռուստամ Մախմուդյանին`Ալագյազի գյուղից, բայց նա եզդի չէ, այլ քուրդ: Հարցրեք` ի՞նչ կրոնի դավանում… Եկել եզդի է դառնում: Այսօր շինծու մեզ քրդացնում են»:
Պարոն Սլոյանը մտահոգություն հայտնեց, թե ՀՀ կառավարությունն արդեն 25 տարի իրենց նվաստացնում են քրդերի դեմ.
«Մենք ազգովի պայքարում ենք քրդանալու դեմ: Առանց մեզ հարցնելու բերել քրդին մեզ թեկնածու են ներկայացրել: Քուրդ ազգը պատմություն չունի, Հայաստանում մի քուրդ կա` Կնյազ Հասանովը»:
Կարդացեք նաև
Հարցին` ո՞րն է նպատակը ՀՀ ղեկավարության կողմից նման վերաբերմունքի են արժանանում, պարոն Սլոյանը պատասխանեց, թե Քուրդիստանից իրենք ֆինանսավորվում են.
«Մենք բողոքում ենք ՀՀ ղեկավարների դեմ, որ շինծու մեզ քրդացնում են: Այսօր ՀՀ կառավարությունը` նախագահից մինչև ԱԱԾ, կաշառվում են, որ քրդական համայնք ցույց տան Քրդստանին, որ ցույց տան, թե Հայաստանում քուրդ կա: Ինչո՞ւ եք մեզ քրդացնում, հայերի հաշվին սարքեք, ասեք քուրդ են, ասեք, որ Արագածոտնի համայնքի հայերի կեսը քուրդ է, ինչո՞ւ եք մեզ քրդացնում»:
Եզդիների միության փոխնախագահ Գոգո Ասոյանը հայտարարեց, թե այն, որ նման քրդամետ թեկնածու է առաջադրվել, նրա ընտրվելու դեպքում իրենք հետագայում լուրջ խնդիրների առաջ են կանգնելու:
Դառնալով Ռուստամ Մախմուդյանի թեկնածությանը` պարոն Ասոյանն ընդունեց, որ նա գրագետ մարդ է, բայց միևնույն ժամանակ պնդեց, որ նա եզդի չէ. «Եթե ինքը ճիշտ մարդ է, թող կանգնի ասի, ինչո՞ւ են մեզ` եզդիներիս, քրդացնում»:
Եզդի համայնքի ներկայացուցիչները, հղում կատարելով ՀՀ օրենսդրությանը, փաստեցին, որ ՀՀ խորհրդարանում պետք է ներկայացված լինի մեկ թեկնածու, սակայն ըստ եզդի համայնքի ներկայացուցիչների` մեկ անձը քիչ է, պետք է գոնե երկուսը լինեն:
Տաթև ՀԱՐՈՒԹՅՈՒՆՅԱՆ