«Սա երկկողմ գործընթաց է եւ երբեւէ չէր կարող պայմանավորված լինել միայն իշխանության PR-ով»,-«Կոնրադ Ադենաուեր» հիմնադրամի՝ այսօր կազմակերպած քննարկման ժամանակ անդրադառնալով ՀՀ-ի եւ ԵՄ-ի միջեւ համապարփակ եւ ընդլայնված գործընկերության համաձայնագրի նախաստորագրմանը, ասաց ՀՀԿ պատգամավոր Կարեն Բեքարյանը:
«Նախաստորագրումից հետո փաստաթղթի շուրջ վերջին համաձայնություն պետք է լինի: Դրան հաջորդելու է ստորագրումը, ապա վավերացման գործընթացը: Գործ ունենք սովորական ընթացակարգի հետ, որը համընկավ քարոզարշավի հետ»,-հավելեց Բեքարյանը:
«Ազատ դեմոկրատներ» կուսակցության փոխնախագահ Անժելա Խաչատրյանի կարծիքով՝ նշյալ փաստաթուղթը տնտեսական բաղադրիչ չի ներառում. «Ոչ մի դրույթ չի հրապարակվում՝ փաստաթուղթը գաղտնի է, բայց հաշվի առնելով այն հանգամանքը, որ ԵՏՄ-ում ենք, ԵՄ-ի հետ համաձայնագրում տնտեսական բաղադրիչներ չեն կարող լինել: Այդ մասին ԵՄ պաշտոնյաներն են նշել»:
Կարդացեք նաև
ՀՀՇ վարչության նախագահ, «Ծառուկյան» դաշինքի պատգամավորի թեկնածու Արարատ Զուրաբյանն էլ նկատեց. «Ուկրաինայի նման հզոր պետությունը փորձ կատարեց գնալ ԵՄ-ի հետ ասոցացման, եւ տեսեք՝ թե ի՞նչ ճակատագրի արժանացավ: Փխրուն ՀՀ-ի համար դա կարող է նաեւ կործանարար լինել»:
«Հայկական Վերածնունդ» կուսակցության պատգամավորի թեկնածու Մհեր Շահգելդյանն էլ նշեց, որ կարեւորում են համաձայնագրի նախաստորագրումը՝ ՀՀ արդարադատության համակարգի արդիականացման, ժողովրդավարության ինստիտուտների կայացման գործում:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
