Դերասան Հրանտ Թոխատյանը երեկ տարբեր ԶԼՄ-ների հետ զրույցում պատմում էր, թե ինչպես է «Թրանսփարենսի ինթերնեյշնլ» կազմակերպության կողմից այս ընտրություններում փորձել դիտորդ լինել Արսինե Խանջյանի, Սերժ Թանկյանի եւ սփյուռքից եկած մեր մյուս հայրենակիցների հետ, անցել է բոլոր դասընթացները, ստացել է ուղեցույցերը եւ հանկարծ ընտրություններից երկու օր առաջ նրան մերժել են եւ ասել, որ ինքն ասոցացվում է ՀՀԿ-ի հետ ու չի կարող լինել դիտորդ:
Այս առնչությամբ մեզ հետ զրույցում «Թրանսփարենսի ինթերնեյշնլ» կազմակերպության իրավախորհրդատու Հերիքնազ Տիգրանյանն ասաց, որ իրենք ունեն որոշակի չափորոշիչներ, որ մարդը պետք է որեւէ կուսակցության չհարի, բացահայտ չհամակրի եւ անդամ չլինի, նաեւ որեւէ կուսակցության գործառույթ չիրականացնի. «Հրանտ Թոխատյանը, ճիշտ է, գրանցվել է, մասնակցել է դասընթացին, բայց որ ինքը ՀՀԿ-ի ցուցակով է ավագանի, կարող էր լինել, օրինակ, «Բարեւ Երեւանով» էլ ավագանի, բայց այն չափորոշիչը, որ չպիտի որեւէ կուսակցության, որեւէ տեղ ներկայացված լինի, չէինք կարող անտեսել: Այդ դեպքում արդեն էական չէր որ կուսակցությունով է ավագանի: Մենք հետո մեր բոլոր դիտորդներին այդ սկզբունքով ֆիլտրել ենք»:
Մեր հարցին՝ շա՞տ մարդիկ են այդ պատճառով դուրս մնացել դիտորդական առաքելությունից, Հերիքնազ Տիգրանյանը պատասխանեց. «Իհարկե, շատ են: Հարցն այն է, որ մեր գրանցման հարցաթերթում կար կուսակցականության վերաբերյալ դրույթ, թե կուսակցական գործունեությամբ զբաղվո՞ւմ են ու արդեն ֆիլտրվում էին: Ուղղակի Հրանտ Թոխատյանի պարագայում մենք ուշացրել ենք: Ինքն ասում է, որ դիմել է՝ դուրս գալու ավագանու կազմից, ինչը մենք չգիտեինք: Երբ հիշեցինք, որ ինքը ՀՀԿ-ի ավագանու անդամ է, մենք մեր սկզբունքը չէինք կարող ոտնահարել, ինչքան էլ իրեն շատ հարգում ենք, իր նախաձեռնությունը, որ միացել է Արսինեենց: Կստացվեր, որ մենք երկակի ստանդարտներ ենք կիրառում՝ անծանոթ մարդ է, ՀՀԿ-ական, իրեն մերժում ենք, բայց ծանոթ մարդ է՝ ՀՀԿ-ական, իրեն ընդունում ենք: Զուտ մենք մեզ չդավաճանելու համար չէինք կարող դա անել»:
Կարդացեք նաև
Հռիփսիմե ՋԵԲԵՋՅԱՆ
