Ապրիլի 23-ին ՀՀ Մշակույթի նախարար Արմեն Ամիրյանը՝ Համահայկական նվագախմբի հետ միասին, այցելեց Ծիծեռնակաբերդի հուշահամալիր: Նվագախմբի անդամները ծաղկեպսակ դրեցին անմար կրակի մոտ:
«Այս օրերին հայ ժողովուրդն առավել համախմբված է դառնում: Ցանկացած հայի աչքերում նշմարվում է պահանջատիրությունը»,-ասաց Արմեն Ամիրյանը:
«Համահայկական նվագախմբին միանալու որոշումը վայրկյաններում եմ կայացրել, չնայած այլ կերպ չէր էլ կարող լինել: Մեր խմբի անդամները աշխարհասփյուռ հայեր են, և մենք այսօր չէինք կարող այստեղ չլինել»,-նշեց նվագախմբի անդամներից Սուրեն Ամիրխանյանը:
Կարդացեք նաև
«Ես շվի եմ նվագում: Երբեմն ինձ ասում են, որ իմ հնչեցրած մեղեդու մեջ շատ թախիծ կա: Դա, իհարկե, այդպես է: Ես ցավ եմ ապրում, որ 102 տարի է անցել, բայց մեղավորները դեռ չեն պատժվել: Երբ ավելի խորն եմ կարդում պատմությունս, զարմանում եմ մարդկային վայրագության վրա: Իմ շվիով ուզում եմ բողոքս արտահայտել ամբողջ աշխարհին»,-ասաց խմբի անդամ՝ Թամար Էսքենյանը:
«Երեք տարի առաջ որդիս ինձ մի նախադասություն ասաց.
-Հիշում եմ և միշտ պահանջելու եմ:
Զարմանալի է, որ դրան հաջորդող տարում՝ Ցեղասպանության 100-րդ տարելիցն այդ կարգախոսն ունեցավ: Հիմա մտածում եմ, որ այդ նախադասությունը պետք է մեր բառացանկի մասը կազմի: Պետք է աշխարհին ցույց տանք, որ մենք առաջվա հայը չենք, որին կոտորում էին ու բռնի տեղահան անում»,- հավելեց Սուրեն Ամիրխանյանը:
Անուշ ԳԱՍՊԱՐՅԱՆ