Այսօր Մայիսի 8-ն է՝ Շուշիի ազատագրման օրը եւ Եռաբլուր էին այցելել բարձրաստիճան պաշտոնյաներ: Վարչապետ Կարեն Կարապետյանը ծաղիկ դրեց սպարապետ Վազգեն Սարգսյանի եւ Զորավար Անդրանիկի շիրիմներին:
Ավելի ուշ վարչապետին Եռաբլուրում մոտեցավ մի կին՝ «պարոն Կարապետյան ջան, իմ հարցը թերի է մնացել» ասելով:
Նա՝ մի կողմից, մյուս կողմից՝ ՀՀԿ-ի տատիկը շրջապատեցին վարչապետին: Գեներալ Մանվելը փորձեց պաշտպանել՝ ասելով. «Չեղավ, չեղավ, էսօր շնորհավորելու օրա, մի հատ շնորհավորեք, լավ, լավ, հետո»:
Կարեն Կարապետյանը, ճանաչելով բողոքող կնոջը՝ ասաց. «Ձեր հարցը լուծել են, բա չե՞ք ամաչում, լավ, Արսե՛ն մի հատ էլ լուծի, ամեն անգամ դուք էդ հարցով…»:
Կարդացեք նաև
Վարչապետի օգնականը՝ Արսենը, մոտեցավ կնոջը եւ սաստեց՝ ես ձեզ միշտ տվել եմ:
Պարզվեց՝ կնոջը տվել էին 120 հազար դրամ, բայց իրեն անհրաժեշտ էր եւս 80 հազար դրամ:
ՀՀԿ-ի տատիկի խնդրանքը վարչապետից այլ էր. «Կառավարության շենքի մոտը մարդիկ կան, քանի որ ես բոլոր հարցերից տեղյակ եմ, ասեմ՝ մարդիկ կան, որ 130 հազար դոլար տվել, տները 3 տեղ առել են եւ եկել են նորից, կեղծ հայրենասիրություն են անում՝ վար-չա-պետ: Ես խնդրում եմ հատուկ մի կամիսիա կազմակերպել, այն մարդիկ, ովքեր գալիս են կառավարության շենքի մոտ երկիրը սթրեսի տակ են պահում, պատվի հետ են խաղում, ստուգեք՝ արդյոք դա ճի՞շտ է, թե՞ եկել են մարդկանց պատվի հետ խաղալու»:
Հռիփսիմե ՋԵԲԵՋՅԱՆ
