Երեւանի ավագանու ՀՀԿ խմբակցության անդամ Նաիրա Նահապետյանը Երեւանի ավագանու նիստում լարված իրավիճակի մասին խոսելիս ասել էր, որ «քաղաքապետը կօգտվի իր լիազորություններից, եւ, եթե «Երկիր Ծիրանիի» անդամները շարունակեն խանգարել նիստերը, պետք է պատասխան տան, եւ դուրս հրավիրվեն դահլիճից, կամ պետք է ստեղծվի Էթիկայի հանձնաժողով, եւ իրենց բառերի համար դատի տան, որպեսզի հասկանան, որ իրենք փողոցում չեն, եւ սա հանրահավաք չէ»:
Այս առնչությամբ այսօր ասուլիսում «Երկիր Ծիրանի» կուսակցության նախագահին հարցրեցինք՝ ձեզ վախեցնո՞ւմ է այդ սպառնալիքը եւ դուք չե՞ք պատրաստվում ինքներդ էթիկայի հանձնաժողով ստեղծել: Նա պատասխանեց. «Նման անձանց էթիկայի հանձնաժողովը չի փրկի, նրանք հատել են էթիկայի խախտումների սահմանը, նրանք որպես սովորական կրիմինալ են իրենց դրսեւորում, կամ պետք է բուժվեն, կամ քրեական հետապնդում պետք է նրանց նկատմամբ լինի»
«Ելք» խմբակցության ավագանու անդամ Զարուհի Բաթոյանն ասել էր, որ ավագանու նիստերից գլխացավանք է առաջանում, շատ կարեւոր հարցերի շուրջ «Երկիր Ծիրանիի» բարձրացրած խնդիրները արվում են ոչ տեղին, ոչ ժամանակին եւ արվում է ոչ չափի մեջ. «Ցանկացած հարցի դեպքում, որը որեւէ կապ չունի դրա հետ, իրենք մեկնաբանություն են անում, որը ժամանակ եւ էներգիա է խլում»:
Այս առնչությամբ Զարուհի Փոստանջյանն ասաց. «Եթե նյարդայնացնում է եւ խնդիրներ են առաջացնում, ուրեմն ճիշտ պահին եւ ճիշտ ժամանակին ենք բարձրացնում»:
Հռիփսիմե ՋԵԲԵՋՅԱՆ
