Եվրոպայի խորհրդի խորհրդարանական վեհաժողովի (ԵԽԽՎ) աշնանային նստաշրջանի լիագումար նիստի ընթացքում ազատ դեբատների ժամանակ քիչ առաջ բանավեճ տեղի ունեցավ հայ և ադրբեջանցի պատվիրակների միջև: Ադրբեջանական պատվիրակության յոթ անդամներ մեկը մյուսի հետևից Հայաստանի դեմ մեղադրական ելույթներով հանդես եկան:
Զուհալ Ֆատալիևան Հայաստանին մեղադրեց, որ ահաբեկիչներին ապաստան տվող երկիր է, խոսեց Օռլիի օդանավակայանի, Վարուժան Կարապետյանի, Վազգեն Սիսլյանի մասին: Վստահեցրեց, թե Հայաստանն ահաբեկչական պետություն ե:
Ռավշան Ռզաևը (լուսանկարում) հայտարարեց, թե ինքը ծնվել է Շուշիում և չի կարողանում իր հայրենիք գնալ, քանի որ «օկուպանտ» հայերը շրջափակել են իր երկիրը:
Զուհալ Ֆատալիևան խոսեց նաև հայերի իրականացրած «սպանությունների, երեխաների գնդակահարությունների», Խոջալուի դեպքերի մասին, թե իբր այն կազմակերպել են հայերը:
Ադրբեջանցի պատվիրակի ելույթին արձագանքեց ԵԽԽՎ-ում հայկական պատվիրակության անդամ, ԲՀԿ խմբակցության պատգամավոր Միքայել Մելքումյանը: Նա վստահեցրեց, որ Խոջալուն կազմակերպել է ադրբեջանական կառավարությունը` Մութալիբովի և Էլչիբեյի գլխավորությամբ:
ԵԽԽՎ հայկական պատվիրակության անդամ, ԲՀԿ խմբակցության պատգամավոր Նաիրա Զոհրաբյանն էլ, հակադարձելով ադրբեջանցի գործընկերներին, հիշեց այն արտահայտությունը, թե գողն առաջինն է գոռում` գողին բռնեք և մտահոգություն հայտնեց, որ Ադրբեջանը, օգտագործելով ԵԽԽՎ-ի բարձր ամբիոնը, լկտի սուտ ու ապատեղեկատվություն է տարածում:
Այնուհետև դիմելով Ռավշան Ռզաևին, ասաց. «Քանի որ իմ ադրբեջանցի գործընկերը ռուսերեն է խոսում, ես նրան կպատասխանեմ ռուսերենով: Ռավշան, վերջապես կողմնորոշվիր` դու որտեղ ես ծնվել: Մի նստաշրջանին հայտարարում ես, որ ծնվել ես Շուշիում, մեկ այլում հայտարարում ես, որ ծնվել ես Սարսանգի ջրամբարի կողքին: Հուսամ, որ մինչև հունվարյան նստաշրջան ժամանակ կունենաս կողմնորոշվելու, թե վերջապես դու որտեղ ես ծնվել և մտածելու, որ անհարմար է ամեն անգամ այս ամբիոնն օգտագործել ապատեղեկատվություն և սուտ տարածելու համար»:
Տաթև ՀԱՐՈՒԹՅՈՒՆՅԱՆ
