«Սասնա Ծռեր-3» գործով այսօր դատարանը մերժեց Կարո Եղնուկյանին գրավի դիմաց ազատ արձակելու վերաբերյալ պաշտպանական կողմի միջնորդությունը:
Դատարանը մերժեց նաեւ Եղնուկյանի գործը՝ «Սասնա ծռերի» գործից առանձնացնելու վերաբերյալ պաշտպանական կողմի միջնորդությունը: Ինչից հետո Եղնուկյանը հայտարարեց, որ չի ուզում մասնակցել նիստին, ուզում է դուրս գալ նիստերի դահլիճից՝ բացատրելով, որ իր նկատմամբ հոգեբանական բռնություն է իրականացվում: Դատարանը ընդմիջեց նիստը, ինչից հետո Եղնուկյանը նիստերի դահլիճ չեկավ: Դատարանն էլ նիստը հետաձգեց:
Մինչ նիստի հետաձգելը փաստաբան Արա Պապիկյանն էլ իր պաշտպանյալներ՝ Աշոտ Պետրոսյանի եւ Արմեն Ղամբարյանի կալանքը, որպես խափանման միջոց փոխելու վերաբերյալ միջնորդություն ներկայացրեց, ինչը կրկին մերժվեց:
Հիշեցնենք, որ դատավոր Արտուշ Գաբրիելյանը «Սասնա ծռեր»-ի 18 անդամի գործից մաս էր անջատել. ամբաստանյալներ Արամ Մանուկյանի, Թաթուլ Թամրազյանի, Տիգրան Մանուկյանի, Սերգեյ Կյուրեղյանի, Թորոս Թորոսյանի, Գևորգ Իրիցյանի, Հովհաննես Հարությունյանի, Արայիկ Հակոբյանի, Մարտիրոս Հակոբյանի, Արամ Հակոբյանի Վարդան Գերավետյանի վերաբերյալ գործն այլևս Արտուշ Գաբրիելյանի վարույթում չի քննվի, իսկ ամբաստանյալներ Արթուր Մելքոնյանի, Տիգրան Սարգսյանի, Արթուր Սողոմոնյանի, Գառնիկ Հովակիմյանի, Հովհաննես Վարդանյանի, Մանվել Աթայանի, Վարդգես Գևորգյանի գործը մնացել էր հենց Արտուշ Գաբրիելյանի վարույթում, որն էլ ստացվում է «Սասան ծռեր 3»:
Արփինե ՍԻՄՈՆՅԱՆ
