«Ժիրայր Սեֆիլյանի եւ մյուսների» գործով դատական նիստում այսօր շարունակվեց ՀՀ ոստիկանության Փորձաքրեագիտական վարչության փորձագետ Ռ. Պողոսյանի հարցաքննությունը:
Նա փորձագիտական եզրակացություն է տվել Սեֆիլյանի ենթադրյալ «զինված խմբի» անդամներից գործով ամբաստանյալ Հրայր Թոփչյանի մոտից հայտնաբերված երկու ինքնաձիգերի եւ 120 փամփուշտների վերաբերյալ, իսկ պաշտպանական կողմը կասկածներ ունի, որ դատաձգաբանական փորձաքննությունն արվել է խախտումներով:
Ամբաստանյալներից Հրայր Թոփչյանի շահերի պաշտպան, փաստաբան Գեորգի Մելիքյանը հարցրեց.
-Եթե հիմա ձեզ ներկայացվեին այդ ինքնաձիգերը, կարո՞ղ էիք հասկանալ, որ դրանց բաղկացուցիչ մասերը հենց այն մասերն են, որոնք ներկայացվել եւ հետազոտվել են դատարանում:
-Այո, քանի որ հիմնական մասերի վրա կան արտադրության համարներ: Մյուս դետալները փոփոխվող են եւ կրակման մեխանիզմի հետ կապ չունեն:
-Ինչպե՞ս համոզվենք, որ այդ ինքնաձիգերը դատարան են հասել առանց փոփոխության:
-Եզրակացության մեջ կան լուսանկարներ, դրանում նշված են նաեւ հիմնական դետալների սերիական համարները:
-Իսկ ինչո՞ւ չեք նկարել նաեւ դետալներն առանձին-առանձին:
-Հնարավոր չէր բոլորը լուսանկարել:
-Մենք չենք կարող վստահ լինել, որ լուսանկարում առկա ինքնաձիգերը հենց այն ինքնաձիգերն են, որոնք ներկայացվել են դատարանում: Ձեզ մոտ դրանք կարող էին փոփոխվել: Ինչո՞ւ միջոցներ չեք ձեռնարկել, որպեսզի ձեր եզրակացությունը բացառեր ինքնաձիգերի փոփոխելիությունը: Նման խախտումները պետք է հետագայում բացառվեն:
Այս հարցը դատավոր Տաթեւիկ Գրիգորյանի կողմից հանվեց: Այնուհետեւ Գեորգի Մելիքյանը հետաքրքրվեց.
-Իմ պաշտպանյալ Հրայր Թոփչյանը դատարանում ասաց՝ դրանք այն փամփուշտները չեն, որոնք հայտնաբերվել են իր մոտ: Ինչպե՞ս համոզվենք:
-Փամփուշտները եւս անհատականացված տվյալներ ունեն:
-Փամփուշտի պիտանելիությունը միայն այն կրակելո՞վ է հնարավոր պարզել:
-Հիմնական մեթոդը դա է: Եթե հնարավոր չէ այն կրակել, փամփուշտն ապամոնտաժում են եւ ըստ մասերի ստուգում: Ես բոլոր փամփուշտները չեմ կրակել, քանի որ հնարավոր էր՝ հետագայում կրկնակի փորձաքննություն նշանակվեր:
Լուիզա ՍՈՒՔԻԱՍՅԱՆ
