Արցախի ԱԺ պատգամավոր, Արցախյան ազատամարտի հրամանատարներից Վահան Բադասյանն այսօր լրագրողների հետ զրույցում անդրադարձավ նաեւ 2016թ. Ոստիկանության ՊՊԾ գունդը գրաված եւ ծանր հանցագործությունների կատարման մեջ մեղադրվող «Սասնա ծռեր» խմբի անդամների դատավարությանը: «Նրանք ծայրահեղ քայլի էին դիմել: Նրանց մեծամասնությունը պատերազմի ճանապարհ է անցել, ուստի նրանք իրավունք ունեն ասելու, որ երկրում բացասական երեւույթներ են տիրում: Իշխանությունները, փոխանակ խնդիրները լուծեին նրանց հետ, եսիմ ում հետ են լուծում»,-ասաց նա:
Վահան Բադասյանը հավելեց. «Զոհված ոստիկանն անցել է իր լիազորությունների սահմանը եւ կրակել: Նա ինքն է կրակել ու կնքել իր մահկանացուն: Մյուս երկու ոստիկաների հետ տղաները կապ չունեն, նրանք արյուն չեն թափել: Խանդոյանն ասաց՝ ինքը չի կարող կրակել ոստիկանի վրա, որովհետեւ ոստիկանն է իր արյունն ու որդին»:
Վահան Բադասյանի համոզմամբ՝ «ծռերին» չպետք է դատեն. «Այս ամենը ոչ թե դատավարություն է, այլ հաշվեհարդար: Լուծման ճանապարհն այն է, որ ժողովուրդը, Արցախյան հերոսամարտով անցած մարդիկ հարց դնեն երկրի ղեկավարության առաջ՝ այսպես շարունակել չի կարելի: Ալիեւը հայտարարում է, որ հասնելու է Երեւան, իսկ մենք մեր հերոսներին բանտարկում ենք»:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
