Օրերս Երեւանի ավագանիում տեղի ունեցած ծեծկռտուքից հետո ՀՀԿ նախկին պատգամավոր Առաքել Մովսիսյանը՝ Շմայսը, զանգահարել էր «Ելք» խմբակցության ավագանու անդամ Ալեն Սիմոնյանին եւ իր հայտնած տեսակետի համար սպառնացել ֆիզիկական հաշվեհարդար տեսնել:
Այս առնչությամբ մեզ հետ զրույցում «Ելք» խմբակցության ԱԺ պատգամավոր Մանե Թանդիլյանը հիշեցնելով վերջին շրջանում եւ ավագանիում, ե՛ւ ԱԺ-ում որոշ ՀՀԿ-ականների, օրինակ, Արտաշես Գեղամյանի պահվածքը, ասաց. «Ազգային ժողովում, երբ մենք նախաձեռնեցինք էթիկայի հանձնաժողով ստեղծել, դա ուներ հենց այն նպատակը, որպեսզի որեւէ մեկը, ում մտքով կանցնի նման վարք դրսեւորել, իմանա, որ լինելու է վատ հետեւանք, թեկուզ հանրային պարսավանք: Ավագանու պարագայում իրավական խնդիր կա, այդ խնդիրները պետք է լուծվեն իրավական ճանապարհով: Պետք է մարդիկ հասկանան, որ բռնությունը հարցերի լուծման ճանապարհը չէ, բռնությունը երբեք արդյունք չի տալու կամ չի ստեղծելու այն պետությունը, որտեղ ես եւ դուք ուզում ենք ապրել, որովհետեւ սա սխալ, ձախողված ճանապարհ է: Չի կարող նման ձեւով ստեղծվել այնպիսի պետություն, որտեղ կարելի է ստեղծագործել, կարելի է iphone ստեղծել: Իրականում միջավայրը, որտեղ մենք ապրում ենք, մենք պետք է ստեղծենք այնպիսին, որ սա լինի խոսքի, կարծիքի, մտքի ազատ արտահայտման, հանուրժողականության մթնոլորտ, իսկ եթե դա տեղի է ունենում ԱԺ-ում կամ ավագանիում, ինչո՞ւ ենք մենք զարմանում, թե փողոցներում մեզ մոտ ինչ է տեղի ունենում: Այդ օրինակը պետք է տան քաղաքական գործիչները, մարդիկ, ովքեր հանրային ընկալում ունեն, հանրային դեմք են»:
Մեր դիտարկմանը, որ, օրինակ, Առաքել Մովսիսյանն արդեն պատգամավոր չի եւ իրեն էթիկայի հանձնաժողովով էլ հնարավոր չէ կաշկանդել՝ Մանե Թանդիլյանն արձագանքեց. «Նա պատգամավոր չէ, բայց իշխող ՀՀԿ կուսակցության խորհրդի անդամ է եւ սա պետք է նաեւ զսպող օղակ լիներ իր համար, բայց ես տեսնում եմ, որ ՀՀԿ-ում դա ոչ միայն չի զսպվում, այլեւ քաջալերվում է»:
Հռիփսիմե ՋԵԲԵՋՅԱՆ
