ԲՀԿ-ն համաժողովրդական շարժմանը միացել է առանց նախապայմանների եւ դա կարող են վկայել նաեւ «Քաղաքացիական պայմանագրի» մեր գործընկերները: Այս մասին խորհրդարանում լրագրողների հետ զրույցում ասաց «Ծառուկյան» դաշինքի պատգամավոր Նաիրա Զոհրաբյանը` Նիկոլ Փաշինյանի հետ հանդիպումից հետո: Լրագրողները հետաքրքրվել էին`ապագա կառավարությունում ԲՀԿ-ն իրեն որտե՞ղ է տեսնում: Նաիրա Զոհրաբյանն ասաց, որ կոռեկտ չէ նման հարցեր տալն այժմ:
Նա ասաց, որ Նիկոլ Փաշինյանի հետ հանդիպման ժամանակ քննարկել են միայն վաղը կայանալիք վարչապետի ընտրության հարցը: Վստահեցրեց`ԲՀԿ-ի այն պատգամավորները, որոնք Հայաստանում են, անպայման ներկա կլինեն եւ կքվեարկեն միասնական`Նիկոլ Փաշինյանի օգտին: Գագիկ Ծառուկյանը կգա՞ ԱԺ նիստին, թե`ոչ, Նաիրա Զոհրաբյանը չգիտե: Այն պատգամավորները, ովքեր Հայաստանում չեն, ասաց` ԱԺ քարտուղարության հետ բանակցությունների մեջ են, որպեսզի իրենց դիրքորոշումը գրավոր հայտնեն:
Նաիրա Զոհրաբյանը նաեւ ասաց, որ իրենք միանալու են ԸՕ-ի փոփոխության հետ կապված Նիկոլ Փաշինյանի հնչեցրած առաջարկներին: Դրանք հնչել են հանրահավաքներում եւ ներառում են նաեւ ռեյտինգային ընտրակարգի փոփոխություն: Նաիրա Զոհրաբյանը հիշեցնում է, այդ առաջարկներն իրենք բարձրաձայնել են դեռ 4+4+4 ձեւաչափով ընտրական օրենսգրքի քննարկումների ժամանակ:
Մանրամասները՝ տեսանյութում
Նելլի ԳՐԻԳՈՐՅԱՆ
