Արցախի նախագահի խորհրդական Տիգրան Աբրահամյանը հայտնել էր, որ հակառակորդը առաջնագծում նկատելիորեն ակտիվացել է՝ զինտեխնիկայի տեղաշարժեր, կուտակումներ, ակտիվ ինժեներական աշխատանքներ, հայաստանյան, արցախյան հասարակության վրա ազդելու փորձեր, քարոզչական աշխատանք բոլոր հնարավոր թիրախներով:
Այս առնչությամբ Aravot.am-ի հետ զրույցում Արցախի հանրապետության նախագահի մամուլի խոսնակ Դավիթ Բաբայանը մեր հարցին՝ ինչ-որ արտառոց իրավիճա՞կ է սահմանի վրա, ի՞նչ է այս պահին կատարվում շփման գծում՝ պատասխանեց. «Կատարվում է այն, ինչի մասին մենք խոսում ենք, սա ոչ թե շահարկումների համար է արվում, ինչպես մի քանի տարօրինակ աննորմալ կարծիքներ են հայտնում, դեպրեսահարվում են, շեղում են ուշադրությունը ներքին խնդիրներից: Նախեւառաջ, Արցախում կատարյալ հանգստություն է, ներքաղաքական կատարյալ կայունություն: Մենք այդպիսի նպատակ չունենք շահարկենք սահմանում տիրող իրավիճակը եւ ներքին խնդիրները: Ադրբեջանական ղեկավարությունն իրենք են հայտարարում, տեսեք ինչպիսի հայտարարություններ են անում: Ապրիլ ամսից մենք ասում ենք, որ կան կուտակումներ եւ որոշ մարդիկ, այդ թվում նաեւ Ադրբեջանի քաղաքացիներ հայկական անունների տակ գրում են, փնովում են, փորձում են շեղել մեր ուշադրությունը: Մենք ասում ենք՝ կան կուտակումներ եւ 2016-ի ապրիլից առաջին անգամ է այսպիսի իրավիճակ, չասե՞նք: Իսկ թե ինչ կլինի, կախված է առաջին հերթին մեր ունակություններից՝ կասեցնել ցանկացած ոտնձգություն: Այս պահի դրությամբ պաշտպանության բանակը կատարում է ամեն ինչ, որ ռազմավարական նախաձեռնողականությունը ամուր պահպանի իր ձեռքերում: Բնական է, որ հակառակորդի զսպիչ ուժերից մեկը դա է: Մեր բանակն է զսպելու, հայության միասնականությունը եւ միջազգային հանրության դիրքորոշումը, որը չի ընդունում այդպիսի մոտեցում: Պարզ է, որ Ադրբեջանի պես աննորմալ երկիրը կարող է դիմել արկածախնդրության: Որպեսզի դա տեղի չունենա, պետք է լինի հզոր բանակ»:
Մենք ճշտեցինք, այսինքն, այս պահին ապրիլյան պատերազմի կրկնությունը չի՞ բացառվում՝ Դավիթ Բաբայանը պատասխանեց. «Ոչ մի բան չի բացառվում, բայց դրա հավանականությունը կախված է ինչպես նշեցի, վերոհիշյալ գործոններից»:
Հռիփսիմե ՋԵԲԵՋՅԱՆ
