Վարչապետ Նիկոլ Փաշինյանի բրյուսելյան այցի մասին ՀՀ արտաքին գործերի փոխնախարար Շավարշ Քոչարյանը գերադասում է խոսել արդյունքներով: Այսօր այդ մասին խորհրդարանում լրագրողների հետ զրույցում ասաց Շավարշ Քոչարյանը`հավելելով, որ դրական է գնահատում վարչապետի մասնակցությունը ՆԱՏՕ-ի գագաթաժողովին: Ի դեպ, Բրյուսելում, ՆԱՏՕ-ի գագաթաժողովի շրջանակներում նախատեսված է ՀՀ եւ Ադրբեջանի արտաքին գործերի նախարարների հանդիպում: Նախարարների հանդիպումից ակնկալիքների մասին խոսելով՝ Շավարշ Քոչարյանն ասաց. «Անզեն աչքով երեւում է, ակնհայտ է, որ բանակցություններում առաջընթաց ապահովելու մասին խոսք լինել չի կարող, դատելով միայն այն հայտարարություններից ու գործողություններից, որը արվում են Բաքվի կողմից»:
Իսկ ռազմական գործողությունների վերսկսումը կանխելու մասով էլ, փոխարտգործնախարարն ասում է. «Պատահական չէ, որ Սանկտ-Պետերբուրգից ու Վիեննայից հետո շեշտադրումը հենց դրա վրա է, իրականում ի հակառակ այդ պարտավորությունների, որ այնտեղ ստանձնեց Ադրբեջանը, այդ գործողությունները չի կատարում: Ադրբեջանը չի կատարում իր ստանձնած պարտավորությունները դեռևս 95թ-ից` եռակողմ համաձայնագրով ստանձնած»: Ամեն դեպքում, ըստ նրա, ՀՀ-ի համար կարևոր են այդ հանդիպումները, որպեսզի կայունություն պահպանելու համար կարողանանք առաջ շարժվել:
Հարցին` առաջ մղվո՞ւմ է Արցախին բանակցային կողմ դարձնելու ՀՀ-ի դիրքորոշումը, Շավարշ Քոչարյանը պատասխանեց` խնդիրն այն է, արդյոք ցանկանում է Բաքուն բանակցային գործընթացում առաջընթաց, թե ոչ. «Ինքնին, եթե դիմադրում է Արցախի մասնակցությանը, հենց վկայությունն է այն հանգամանքի, որ ինքը առաջընթաց չի ցանկանում»:
Անդրադառնալով Հայաստանի արտաքին քաղաքականությանը, Շավարշ Քոչարյանը վստահեցնում է`այն շատ պարզ է ու հստակ. ոչ պրոռուսական է, ոչ պրոարեւմտյան է, ոչ պրոարեւելյան, ինքը պրոհայկական է:
Հարցին`տեղի՞ն են այն խոսակցությունները, որ հեղափոխությունից հետո Եվրոպան ավելի ընդլայնված ձեւով է համագործակցելու ՀՀ-ի հետ, նաեւ ֆինանսական հատկացումների մասով, Շավարշ Քոչարյանը պատասխանեց. «Ապագան ցույց կտա: Մենք պատրաստ ենք բոլոր պետությունների հետ հաղորդակցության»:
Այլ մանրամասները`տեսանյութում
Նելլի ԳՐԻԳՈՐՅԱՆ
