«Ես Լավրովի խոսքում չտեսա ձեր ներքին գործերին խառնվել, նա չէր ասում՝ ազատ արձակեք Քոչարյանին». Մարկեդոնով

Այսօր «Հոդված 3» ակումբում ՌԴ արտգործնախարար Սերգեյ Լավրովի աղմկահարույց հայտարարության թեմայով քննարկման ժամանակ Մոսկվայի քաղաքական եւ ռազմական վերլուծությունների ինստիտուտի փոխտնօրեն Սերգեյ Մարկեդոնովն ասաց, որ Լավրովի հայտարարությունն այսպիսի աժիոտաժ է առաջացրել, որովհետեւ մինչ այս, ինչ ՀՀ-ում իշխանություն է փոխվել, ՌԴ պաշտոնական դեմքերը որեւէ կոշտ գնահատական չէին տվել. «Այո, քաղաքագետները, լրագրողները որոշակի գնահատականներ տալիս էին, համեմատում էին Ուկրաինայի դեպքերի հետ, բայց դա պաշտոնական մոտեցում չէր: Պաշտոնական մոտեցումը շատ փափուկ էր, հայտարարություններ եղան, որ ՌԴ-ն պատրաստ է աշխատել նոր իշխանությունների հետ: Հետո կոնկրետ գործընթացներ եղան, Փաշինյանն ու Պուտինը երկու անգամ հանդիպեցին, Ռուսաստան այցելեց պաշտպանության նախարար Դավիթ Տոնոյանը, Մնացականյանը ու ահա եղավ Լավրովի հայտարարությունը: Խնդիրն այն չէ, թե Մոսկվան համերաշխությունից ելնելով պաշտպանում է: Վերջին շրջանում ես Քոչարյանի գործի հետ կապված մեկնաբանություններ եմ անում ու հաճախ ընդդիմախոսներս ասում են՝ դուք նրան պաշտպանում եք: Ես փաստաբան չեմ: Ինչը կարող է այս իրավիճակում մտահոգել, բնավ ոչ Քոչարյանի անձնական ճակատագիրը, այլ այն, թե ինչ արտաքին քաղաքական օրակարգ կձեւավորի Հայաստանը, որը մեր ռազմավարական դաշնակիցն է, շատ կարեւոր է Կովկասում ՌԴ-ի համար: Եվ այն, ինչն անհանգստացնում է ՌԴ-ին, այն է, որ Հայաստանի իշխանությունները հեղափոխական ճանապարհով փորձում են քանդել, կտրել նախորդ իշխանությունների հետ կապը եւ դրանով խախտել շարունակականության սկզբունքը: Սա բավական վտանգավոր է»:

Քաղաքագետ Ստեփան Գրիգորյանն ասել էր, որ ՌԴ-ն սովոր է, որ ՀՀ իշխանությունները հարաբերվեն իրենց հետ՝ քծնանքով, քծնվելով: Մարկեդոնովը չհամաձայնեց. «Ես համաձայն չեմ, որ Հայաստանի նախորդ իշխանությունները քծնել են: Սերժ Սարգսյանը, օրինակ, դժգոհել է այն մասին, որ ՀԱՊԿ-ը չի արձագանքում ոչ թե այն ժամանակ, երբ Ղարաբաղի ուղղությամբ են կրակում, այլ՝ երբ հայ-ադրբեջանական սահմանին լարվածություն կա»:

Մարկեդոնովն ասաց, որ միշտ չէ, որ ինչ ուզում ենք, պիտի անենք, շատ կարեւոր նրբություններ կան: Հայաստանի հեղափոխության մասին խոսելիս այսպիսի տպավորություն է, որ Նիկոլ Փաշինյանը հանրահավաք է անում, երիտասարդները հավաքվում են, բայց հեղափոխության երկրորդ կողմն էլ կա: Դա քաղաքական համաձայնություններն ու բանակցություններն են. «Մոսկվան կարծում էր, որ իշխանության փոփոխության գործընթացը ՀՀ-ում կլինի կոկիկ ճանապարհով, կոշտ մեթոդներ չեն լինի: Այո, մենք որոշ բաների վրա աչք փակեցինք, բայց սկզբունքներ կան»:

Ինչ վերաբերում է Լավրովի հայտարարությանը՝ Մարկոդոնովն ասաց. «Ես Լավրովի խոսքում չտեսա ձեր ներքին գործերին խառնվել, նա չէր ասում՝ ազատ արձակեք Քոչարյանին, նա խոսում էր խառնաշփոթի մասին: Դա մտահոգություն էր: Դասական դիվանագիտությունը ենթադրում է համաձայնություններ ու պայմանավորվածություններ: Այդ ժամանակ պետք է բանակցել, ոչ թե հրապարակային ձեւով արձագանքելով՝ խորացնել պրոբլեմները, որը երկու կողմերի շահերից չի բխում»:

Հռիփսիմե ՋԵԲԵՋՅԱՆ