Հայաստանյան սնունդ արտադրողների կողմից կերակրի աղի փոխարեն տեխնիկական աղի օգտագործման ահազանգի առնչությամբ այսօր լրագրողներին պարզաբանում տվեց նաեւ Սննդամթերքի անվտանգության տեսչական մարմնի սննդամթերքի անվտանգության եւ որակի հսկողության տեսչության պետ Վահե Դանիելյանը:
Նա, մասնավորապես նշեց. «Տեսչական մարմինը տեխնիկական աղի նկատմամբ ներմուծման փուլում հսկողություն չի իրականացնում, դրանց ծավալների մասին մենք տեղեկատվության չենք տիրապետում: Խոսքը սահմանային պետական վերահսկողության մասին է: Ինչ վերաբերում է շուկային, սննդի արտադրության փուլում վերահսկում ենք իրականացնում նաեւ հումքի հանդեպ: Աղը, հանդիսանալով սննդի անվտանգության արտադրության մեջ օգտագործվող բաղադրիչ, մեր հսկողությանը ենթակա է: Մի քանի դեպք արձանագրել ենք, երբ օգտագործվել է տեխնիկական աղ, մի դեպքում՝ առանց մակնշման, մյուս դեպքում՝ աղը յոդավորված չի եղել: Նաեւ հենց յոդավորված չլինելու միջոցով ենք պարզում, որ աղը տեխնիկական է, քանի որ տեխնիկական աղն առհասարակ չի յոդավորվում: Ամեն դեպքում, միշտ զգոն ենք, որովհետեւ կան անբարեխիղճ տնտեսվարողներ»:
Վահե Դանիելյանը հավելեց, որ ստուգումների արդյունքներով՝ երեք սնունդ արտադրող ընկերություն է տեխնիկական աղ օգտագործել:
Լուիզա ՍՈՒՔԻԱՍՅԱՆ
