Սեպտեմբերի 7-ին Ստեփանակերտում տեղի է ունեցել «Արդարություն» կուսակցության հիմնադիր համագումարը:
«Օրինականություն, արդարություն, արժանապատիվ կյանք» կարգախոսով հանդես եկող նորաստեղծ կուսակցության հիմնադիր համագումարի աշխատանքները կազմակերպվել են նախաձեռնող խմբի կողմից:
Նախաձեռնող խմբի անդամ Մարսել Պետրոսյանն իր ելույթում ասաց, որ պահը համարում է պատմական՝ նորօրյա Արցախի պատմության մեջ:
«Այսօր Արցախի քաղաքական դաշտի ձևավորման պատմության մեջ նշանակալի օր է: Ծնունդ է առնում մի նոր քաղաքական ուժ, որը նպատակ ունի ամենաակտիվ մասնակցությունն ունենալ մեր հայրենիքի ներկայի և ապագայի կերտման կարևոր ու շնորհակալ գործում: Մենք այլևս կուսակցություն ենք և հետամուտ ենք լինելու արցախյան իրականության առաջընթացին խանգարող խնդիրների հաղթահարմանը»,-նշեց Մ. Պետրոսյանն, ընդգծելով, որ առաջին հերթին անհրաժեշտ է մարդկանց մոտ վերականգնել արդարության նկատմամբ հավատը, քանի որ այսօր դա խաթարված է:
Նախաձեռնող խմբի անդամ Միքայել Սողոմոնյանն էլ իր հերթին նշեց, որ իրենց միավորել է մի սկզբունք և գաղափար՝ Արցախի ապագայի հանդեպ ունեցած անհանգստությունը:
«Մեր քաղաքական դաշտում մեր ուրույն տեղն ու դերակատարումն ունենալու համար մեր ամենօրյա գործունեության ընթացքում առաջնահերթ խնդիր պետք է հանդիսանա վերականգնել մարդկանց տրամադրվածությունն ու հավատը երկրի ապագայի և իշխանությունների հանդեպ:
Մենք հաստատակամ ենք ձևավորելու այնպիսի կուսակցություն, որը հիմնված չէ, որևէ անհատի անձնական կամ առանձին խմբերի նկատառումների հիման վրա: Մեր կուսակցությունն արտահայտում է ինչպես ազատականության գաղափարները կրողների, այնպես էլ բոլոր այն սոցիալական շերտերի շահերն ու խնդիրներն, որոնք ցանկանում են տեսնել կայուն, ժողովրդավարական և ազգային ավանդույթների վրա զարգացած պետություն՝ կայացած քաղաքացիական հասարակությամբ»,- նշեց Մ. Սողոմոնյանը:
Նա ընդգծեց, որ կուսակցությունը պետականաշինության զարգացման ուղին տեսնում է Արցախում իրավունքի գերակայության երաշխավորմամբ իրավական պետության կառուցման մեջ և իր ամենօրյա գործունեության ընթացքում անողոք պայքար է մղելու կաշառակերության, պետական ունեցվածքի հափշտակության, ստվերային տնտեսության և հովանավորչության դեմ՝ հանուն երկրի ժողովրդավարացման և բնակչության կենսամակարդակի բարձրացման:
Այնուհետև, ըստ օրակարգի, համագումարում հաստատվեց կուսակցության ծրագիրն ու կանոնադրությունը և ընտրվեց կուսակցության ղեկավար կազմը:
Նախաձեռնող խմբի չորս անդամներ Մարսել Պետրոսյանը, Միքայել Սողոմոնյանը, Հակոբ Հակոբյանը և Նորայր Մուսայելյանն ընտրվեցին կուսակցության համանախագահներ:
Դավիթ ԱԲԱՂՅԱՆ
