ԱՄՆ-ը հավատարիմ է Լեռնային Ղարաբաղի հակամարտության կարգավորմանը խաղաղ ճանապարհով: Այս մասին այսօր Բաքվում տեղի ունեցած մամուլի ասուլիսում հայտարարել է ԱՄՆ նախագահի՝ ազգային անվտանգության հարցերով օգնական Ջոն Բոլթոնը:
Բոլթոնի խոսքով՝ ԼՂ հակամարտության կարգավորումը կարող է ազդել ոչ միայն տարածաշրջանում, այլև ամբողջ աշխարհում խաղաղության հաստատման վրա:
«Այսինքն, Լեռնային Ղարաբաղի հակամարտության կարգավորումը ռազմավարական տեսանկյունից կարևոր նշանակություն ունի նաև մեզ համար»,- ասել է Բոլթոնը:
ԱՄՆ խորհրդականը նշել է, որ Ադրբեջանից հետո պատրաստվում է այցելել Հայաստան, և հույս է հայտնել հանդիպումներ ունենալ Հայաստանի պաշտոնական ներկայացուցիչների հետ և ծանոթանալ ԼՂ կարգավորման հարցում Երևանի հայացքների հետ:
«ԱՄՆ-ը ԵԱՀԿ Մինսկի խմբի համանախագահներից մեկն է, և գործելով այդ ուղղությամբ, մենք կշարունակենք հավատարմություն ցուցաբերել խաղաղ ճանապարհով հակամարտության կարգավորմանը»,- ասել է Բոլթոնը:
Պատրաստեց՝ Վիկտորյա ԱՆԴՐԵԱՍՅԱՆԸ
