ԱԺ ՀՅԴ խմբակցության պատգամավոր Արմեն Ռուստամյանը կարծում է, որ օրերս Գեղարքունիք այցելած ՀՀ վարչապետի ԺՊ Նիկոլ Փաշինյանի ելույթներում որոշ արտահայտություններ նախընտրական քարոզ են նշանակում. մասնավորապես նրանք, որոնք մատնանշում են՝ «պետք է մեզ ձայն տաք, որպեսզի սկսվածն ավարտին հասցվի»: «Նշանակում է, որ քաղաքացիները պետք է ձայն տան Նիկոլ Փաշինյանի գլխավորած ցուցակին: Քարոզչությունը հենց դա է, հո պոզով պոչով չի՞ լինում»,-ԱԺ-ում լրագրողների հետ զրույցում այսօր ասաց Արմեն Ռուստամյանը:
Նրա խոսքով՝ ՀՀ կենտրոնական ընտրական հանձնաժողովը պարտավոր է արձագանքել Փաշինյանի մարզային այցին. «Նման պաթոսն արդեն իսկ անհավասարություն է ստեղծելու ընտրություններում: Ընտրազանգվածն ամբողջությամբ կողմնորոշվել է, դրա համար ասում էինք, որ նորմալ միջավայր ձեւավորելու համար ժամանակ պետք է տրվեր, ընտրական օրենսգիրքն էլ՝ փոխվեր, որ մրցակցությունը բնական լիներ»:
Հիշեցնենք, որ «Իմ քայլը» դաշինքի պատգամավորի թեկնածու Լենա Նազարյանն այսօր մեկնաբանել էր խնդիրը:
ԱԺ արտահերթ խորհրդարանական ընտրությունները տեղի կունենան դեկտեմբերի իննին:
Լուիզա ՍՈՒՔԻԱՍՅԱՆ
