Խորհրդարանում, որպես ռուսական համայնքի ներկայացուցիչ պատգամավոր դարձած «Իմ քայլը» խմբակցության անդամ Ալեքսեյ Սանդիկովը Մխիթար Հայրապետյանին հարց ուղղեց, թե ի՞նչ դիրքորոշում ունի Հայաստանում ռուսաց լեզուն որպես երկրորդ լեզու պահպանման տեսանկյունից ու ո՞րն է ձեր տեսլականը՝ հետագայում ռուսաց լեզվի պահպանման հարցում. «Ինչպես գիտենք, ԵԱՏՄ անդամ ենք, որտեղ աշխատանքային լեզուն ռուսերենն է, վերջիվերջո ՌԴ-ն մեր ամենամեծ սփյուռք ունեցող բարեկամական, եղբայրական երկիրն է»: Սանդիկովն ասաց, որ հետխորհրդային շրջանից նկատվում է, որ ռուսերենը կորցնում է իր կարեւորությունը ՀՀ-ում:
Հիշեցնենք, որ Մխիթար Հայրապետյանը առաջադրվել է ԱԺ կրթության, գիտության, մշակույթի, երիտասարդության եւ սփյուռքի հարցերի հանձնաժողովի նախագահի պաշտոնում: Նա պատասխանեց, որ այդ հանձնաժողովը քաղաքականություն մշակող չէ ու ի պաշտոնե այդ հարցերին չի կարող պատասխանել: Նա ներկայացրեց իր անձնական կարծիքը. «Ես ինքս չեմ տեսնում կարեւորության նվազեցում ռուսերեն լեզվի: Կարծում եմ, բոլոր հնարավորությունները կան, որ թե՛ դպրոցում, թե՛ բուհում լեզվի ուսուցման համար: Եթե որեւէ խոչընդոտների դուք ինքներդ հանդիպել եք, ապա ուրախ կլինենք, որ դուք ներկայացնեք նաեւ հանձնաժողովին ու մենք գործադիրից մեր գործընկերների հետ պատրաստ ենք քննարկել»:
Սանդիկովն ասաց, որ պատրաստ է հանձնաժողովի աշխատանքներին մասնակցել. «Սա ինձ համար ե՛ւ համայնքի հարց է, ե՛ւ ընտանեկան հարց է, շնորհակալ կլինեմ, եթե լսեք նաեւ իմ կարծիքը»:
Սերգեյ Մովսիսյանն էլ Հայրապետյանին հարցրեց դպրոցների տնօրենների ընտրության կարգից: Ըստ նրա, հատկապես մարզերում խնամի-ծանոթ-բարեկամ սկզբունքով են տնօրեն նշանակում: Մխիթար Հայրապետյանը պատասխանեց, որ նեղ մասնագիտական հարց է, ժամանակի ընթացքում կկարողանա դրան պատասխանել:
«Իմ քայլը» խմբակցությունից Սիսակ Գաբրիելյանը դժգոհեց բուհում միասնական դասագրքերի բացակայությունից, ասաց, որ երբ տվյալ դասախոսի հեղինակած դասագրքերից չեն օգտվում, այլ աղբյուրներից են օգտվում, դասախոսն ուսանողին ասում է սխալ ես ու ցածր է գնահատում: Որպես դասախոս՝ ԲՀԿ-ական Գեւորգ Պետրոսյանը հորդորեց, որ այդպիսի դասախոսներին ուղարկել այլ տեղ, եթե բացի իր հեղինակած գրքերից, այլ հեղինակների գրածը չի ընդունում:
Հռիփսիմե ՋԵԲԵՋՅԱՆ
