«Հույս ունեի, որ հեղափոխությունից հետո նաև ոստիկանական համակարգը պետք է փոխվի, քանի որ ոստիկանապետ փոխվեց, բայց տեսնում ենք՝ ոստիկանության նախկին աշխատողները, որոնք ապրիլյան հեղափոխության օրերին բիրտ ուժ և բռնություն էին կիրառում, նույն այդ ոստիկաններն այդ հավաքի ընթացքում էին ծառայություն իրականացնում: Ոստիկանական համակարգում այնքան էլ մեծ բան չի փոխվել»,-«Նոյյան Տապան» լրատվական գործակալության մամուլի սրահում հայտարարեց Հելսինկյան ասոցիացիա իրավապաշտպան ՀԿ փաստաբան Արա Ղարագյոզյանը:
Նա միևնույն ժամանակ համեմատություն տարավ նախկին իշխանությունների օրոք ոստիկանության գործողությունների միջև ու նշեց. «Ամեն դեպքում` ոստիկանությունը փողոց բացելուց այդքան էլ բիրտ ուժ չկիրառեց: Բայց ամեն դեպքում` մենք մտահոգություններ ունենք ոստիկանության գործողությունների վերաբերյալ: Եվ այն միջադեպն է մտահոգիչ, երբ կարմիր բերետավորը բռնություն կիրառեց ցուցարարների նկատմամբ: Ավելի ագրեսիվ պահվածք ունեին կարմիր բերետավորները: Տեսանք այն ոստիկաններին, որոնք նախկին իշխանության օրոք են եղել և նրանք սովոր են բիրտ ուժ կիրառելուն: Որոշ անհատ ոստիկաններ լեզվակռվի մեջ էին մտնում քաղաքացիների հետ: Ամեն դեպքում, որպես ոստիկան պետք է զսպվածություն ցուցաբերեին, իսկ դա տեղի չունեցավ: Մի ոստիկան բռնություն կիրառեց քաղաքացու նկատմամբ: Դա մտահոգիչ էր: Նաև մտահոգիչ է ոստիկանների նկատմամբ բռնությունը, քանի որ ոստիկան էլ է տուժել: Մտահոգիչ է այն փաստը, որ գլխավոր դատախազությունը հայտարարություն տարածեց, որ նյութեր են հավաքվում ոստիկանի նկատմամբ բռնության կիրառման փաստով, բայց որևէ հայտարարություն չկա այն մասին, որ քաղաքացու նկատմամբ կարմիր բերետավորի կողմից բռնության վերաբերյալ են նյութեր պատրաստվում»:
Փաստաբանը շեշտեց՝ հավաքը խաղաղ է եղել, զենքով գործողություն, բռնության կոչեր չեն եղել. «ՀՔԾ-ն, հուսով եմ, պարտադիր հայտարարություն պետք է տարածի և քաղաքացիների նկատմամբ բռնություն կիրառելու փաստով քրեական գործ պիտի հարուցվի և պետք է պահանջատեր լինենք, որ այդ ոստիկանը ենթարկվի քրեական պատասխանատվության: Եթե դա չլինի, այսօր ոստիկանական համակարգում անպատժելիությունը կշարունակվի»:
Հելսինկյան ասոցիացիա իրավապաշտպան ՀԿ նախագահ Նինա Կարապետյանցին վրդովեցրել է ՀՀ ԱԺ պատգամավոր, Մարդու իրավունքների պաշտպանության եւ հանրային հարցերի մշտական հանձնաժողովի նախագահ Նաիրա Զոհրաբյանի այն ֆեյսբուքյան գրառումը, թե ո՞ւր էին օպերայի բակում ցույցի իրականացման օրը իրավապաշտպանները: Այս առիթով նա հայտարարեց. «Անկեղծ զարմացած եմ, քանի որ անձամբ եմ մոտեցել տիկին Զոհրաբյանին: Երկու օր շարունակ մենք եղել ենք այնտեղ: ԲՀԿ կուսակցության տարբեր պատգամավորներ, եթե տարբեր ժամանակ են եղել այդ կետերում, մենք միշտ եղել ենք այնտեղ, որտեղ ամենաթեժն է եղել: Խոսքն այն տարիների մասին է, երբ հանցավոր ռեժիմն էր երկիրը զավթել, և տիկին Զոհրաբյանի կուսակցությունը հենց այդ հանցավոր ռեժիմի մասն էր կազմում, և որևէ արձագանք մենք չէին ստանում»:
Նինա Կարապետյանցն ասաց՝ իրենց գնահատականն էր այն, որ կան որոշ անկարգ ցուցարարներ, որոշ ոչ զուսպ ոստիկաններ, բայց այն, ինչի մասին խոսեց Զոհրաբյանը, թե բիրտ ուժ է կիրառվում, ոստիկանների գործողություններն այնպիսի անհամաչափ են, որ մարդու իրավունքների խախտում կա, դա այդպես չէ: Այնուհետև հավելեց. «Տիկին Զոհրաբյան, Դուք տեղյակ չեք՝ ինչ է նշանակում բիրտ ուժ, քանի որ բիրտ ուժի կիրառման ժամանակ Դուք սեղմել եք բիրտ ուժ կիրառողների ձեռքը: Այսքան բանը ես չէի ասի, եթե ես անձամբ օպերայի տարածք գնացած չլինեի: Իմ գործընկերներն իրարից անկախ՝ առանց պայմանավորվելու, եկել էին, քանի որ դա մեր պարտականությունն էր: Անձամբ մոտեցել եմ Զոհրաբյանին, երբ նա ուղիղ եթերում Կենտրոնի թաղապետին հարցեր էր ուղղում, թե ինչ է անում ոստիկանությունը: Եկել էի տեղեկացնելու Զոհրաբյանին, որ պետք է հասկանա՝ թաղապետը ոստիկանության գործողությունների հետ կապ ունենալ չի կարող: Երկու հարց ուներ պարզելու Զոհրաբյանը՝ արդյոք որոշումն օրինակա՞ն է, թե՝ ոչ և եթե իսկապես եղել է անհամաչափ ուժի կիրառում, ոստիկանապետի հետ պիտի կապ հաստատվեր: Բայց նրա մտադրությունը լրիվ այլ էր: Երբ կուսակցությունները հանկարծ պատահական դառնում են ընդդիմադիր, կրկին հայտնվում են խորհրդարանում և դառնում խիստ ընդդիմադիր, շատ լավ պիտի հասկանան, որ չեն կարող ընդդիմադիր լինել այն պարզ պատճառով, որ տարիներ շարունակ իրենք չեն լսել ժողովրդի ձայնը: Դեռ օդում կախված են այն լուրերը, թե ԲՀԿ որոշ անդամներ ինչ մասնակցություն են ունեցել մարտի 1-ին, եթե որոշ տեղերում զիջումներ են տալիս, դա չի նշանակում, որ ժողովուրդը մոռացել է»:
Այնուհետև ամփոփեց. «Ես կխնդրեմ տիկին Զոհրաբյանին հետայսու շատ զգույշ լինել արտահայտությունների մեջ, քանի որ թույլ չեմ տա այն իրավապաշտպաններին, որ իսկապես աշխատել են և ոլորտում եղել են այն թիմը, որոնք անձամբ են քրեական հետապնդման ենթարկվել տարբեր ժամանակներում, հանկարծ ինչ-որ մեկը տեղից վեր կենա և որոշի, որ ինքն ընդդիմադիր է: Ո՞ւր էր տիկին Զոհրաբյանը շատ ու շատ դեպքերի ժամանակ, երբ իսկապես ընդդիմադիրներին էին հետապնդում: Դուք դեռ չեք մաքրվել ձեր նախկին վրիպակներից, մեղմ ասած, երբ կմաքրվեք, կներվեք ժողովրդի կողմից, այդ ժամանակ հայտարարություն կանեք՝ ուր են իրավապաշտպանները»:
Հարցին՝ այնուամենայնիվ, սրճարանների ապամոնտաժումը ճի՞շտ էր, Նինա Կարապետյանցը պատասխանեց. «Եթե լիներ չնչին տոկոս այդ որոշումը դատարան բողոքարկելու, ես վստահ եմ՝ կմտնեին, կբողոքարկեին, և դատարանը շանս կտար: Իհարկե, դա օրինական է եղել»:
Արա Ղարագյոզյանն էլ հավելեց՝ կան սրճարաններ, որ բողոքարկել են, ինչը նորմալ, իրավական ճանապարհ է: Օրինակ՝ «Մեղեդին»:
Aravot.am-ը Նինա Կարապետյանցին հիշեցրեց՝ Օպերայի տարածքում սրճարանների ապամոնտաժման հետ կապված բողոքի ցույցերի ժամանակ տեսախցիկներն արձանագրել են, որ զրուցում է Ավանի փոխքաղաքապետի հետ: Հարցին՝ կարո՞ղ եք մանրամասնել՝ ինչի՞ մասին էր զրույցը, քանի որ կարծես բռնությունների մասին եք հիշատակում, Նաիրա Զոհրաբյանի անունն է հնչում՝ վիրավորական որակմամբ, Նինա Կարապետյանցը դժվարությամբ հիշեց այդ դրվագը, բայց երբ մտաբերեց ասաց. «Ներսես Պողոսյանի հետ, այո, զրուցել եմ: Նա իմ պաշտպանյալն է եղել: Զարմանալի կլիներ, եթե իր հետ չզրուցեինք: Ինքն այնտեղ էր՝ Կենտրոն թաղապետարանի՝ իրենց գործընկերներին աջակցելու համար: Ես ինքս երևանցի եմ՝ Երևանում եմ մեծացել և կարող է օպերայի բակում շատ մարդկանց տեսնեմ և զրուցեմ»:
Նինա Կարապետյանցը մտահոգություն հայտնեց՝ այն բոլոր դատավորները, որոնք նախկին հանցավոր ռեժիմի օրոք ապօրինի որոշումներ են կայացրել մարդկանց նկատմամբ, շարունակում են առոք-փառոք ապրել, աշխատել ու մանրամասնեց. «Մինչև այսօր դատական համակարգում աշխատում են այն մարդիկ, որոնք ծառայել են նախորդ հանցավոր ռեժիմին: Մինչև այսօր աշխատում է Մնացական Մարտիրոսյանը, Գարիկ Պողոսյանը: Նորմալ չէ, որ դատախազական մարմինները, քննիչները, որոնք ակնհայտ անմեղ մարդկանց մեղադրանք են առաջադրել, այժմ շարունակում են աշխատել: Այս հեղափոխության տապալումը լինելու է հենց ուժային և արդարադատական մարմինների թեթև ձեռքով: Չգիտեմ՝ ինչի վրա է հույսը դրել Փաշինյանը»:
Տաթև ՀԱՐՈՒԹՅՈՒՆՅԱՆ
