Բրիտանիայի վարչապետ Թերեզա Մեյը իր Պահպանողական կուսակցության պատգամավորներին խոստացել է, որ հրաժարական կտա, եթե խորհրդարանն այնուամենայնիվ, ընդունի Եվրամիությունից դուրս գալու՝ երկու անգամ տապալված համաձայնագիրը, հաղորդում է BBC-ն:
«Ես պատրաստ եմ այս պաշտոնը թողնել ավելի վաղ, քան նախատեսում էի… Ես բոլորին այս դահլիճում խնդրում եմ պաշտպանել համաձայնագիրը, որպեսզի մենք այդպիսով կարողանանք կատարել մեր պատմական պարտքը, կատարել բրիտանացի ժողովրդի որոշումը և կազմակերպված և սահուն դուրս գանք Եվրամիությունից»,- ասել է Մեյը իր կուսակցության պատգամավորների հետ հանդիպմանը:
Հանդիպման մասնակիցները լրագրողների հետ զրույցում ենթադրել են, որ Մեյի առաջարկի էությունը հետևյալն է. խորհրդարանն այս շաբաթ կհաստատի համաձայնագիրը, որով Բրիտանիան մայիսի 22-ին դուրս կգա ԵՄ-ից: Թերեզա Մեյն անմիջապես հրաժարական կտա, և կսկսվի նոր վարչապետի ընտրության գործընթաց:
Հենց այդ վարչապետն էլ կզբաղվի ԵՄ-ի հետ հետագա հարաբերությունների մասին բանակցություններով, որոնք, ըստ համաձայնագրի, կշարունակվեն մինչև 2020թ. վերջ:
Կարդացեք նաև
Հայտնի չէ, սակայն, արդյոք Մեյին կհաջողվի համոզել բավարար թվով պատգամավորների: Վերջին անգամ՝ մարտի 12-ին, համաձայնագիրը մերժվել է ձայների մեծամասնությամբ (149 ձայն), այսինքն Մեյին անհրաժեշտ է իր կողմը գրավել Համայնքների պալատի 75 և ավելի պատգամավորների:
Պատրաստեց՝ Վիկտորյա ԱՆԴՐԵԱՍՅԱՆԸ
