Այսօր ավելի վաղ Մոսկվա-Երևան դադարեցված չվերթի ուղևորները պատմել են, որ օդանավում տարհանման ժամանակ հրմշտոց է սկսվել: Ուղևորներից մեկը հասցրել է տեսանկարահանել կատարվածը:
Վյաչեսլավ անունով ներկայացած ականատեսը մի քանի տեսանյութ է նկարել: Դրանցից մեկում նա արդեն ավտոբուսում պատմում է, որ «ամենասարսափելին հրմշտոցն էր»:
Օդանավում եղած մի կին էլ պատմել է, որ տարհանման սկզբում հրմշտոց չի եղել, և անձնակազմն օգնել է իրենց դուրս գալ ինքնաթիռից: Նա, մասնավորապես, նշել է, որ մի խումբ իրենց մշտապես հանգստացնում էր և կոչ էր անում խուճապի չենթարկվել: Ուղեկցորդներից մեկն էլ նրա խոսքով ասել է՝ «փախեք՝ ով ինչպես կարող է»: Դրանից հետո, նրա խոսքով, ինքը հասկացել է, որ ինչ-որ լուրջ բան է կատարվել:
Ուղևորներից մեկն էլ նշել է, որ օդանավում ծուխ է լցվել: «Բոլորը խուճապի մատնվեցին, սկսեցին գոռալ, բղավել»,- պատմել է նա: Նրա խոսքով՝ օդաչուն, որն արդեն արագություն էր հավաքել, անմիջապես կանգնեցրեց օդանավը, որից հետո սկսվեց տարհանումը: Նա նշել է, որ իրենց տեղափոխել են օդանավակայան, ուտելիք և ջուր են տվել, որոշ ժամանակ անց այլ օդանավ են տրամադրել:
Կարդացեք նաև
Հիշեցնենք, օդանավում եղել է 173 ուղևոր և անձնակազմի 6 անդամ: Ուղևորների մեծ մասը մեկ այլ օդանավով մեկնել է Երևան: 19 ուղևոր հրաժարվել է թռիչքից։
Պատրաստեց՝ Վիկտորյա ԱՆԴՐԵԱՍՅԱՆԸ
