Այսօր դատարանը որոշեց բավարարել վարույթ իրականացնող մարմնի միջնորդությունը եւ ԱԺ նախկին պատգամավոր Մելիք Մանուկյանի եղբորը`Ռոբերտ Մանուկյանին կալանավորելու որոշում ընդունեց: Ռոբերտ Մանուկյանը կալանավորվեց երկու ամսով:
Aravot.am-ի հետ զրույցում Ռոբերտ Մանուկյանի պաշտպան Հովսեփ Սարգսյանն ասաց, որ որոշումը կողմերին դեռ չի տրամադրվել, ինքը ծանոթ չէ, թե ի՞նչ հիմնավորումներով է դատարանը նման որոշում կայացրել, սակայն, վստահ է, որ դատարանի հիմնավորումները իրավական տեսանկյունից փաստարկված չեն լինելու, քանի որ միջնորդության մեջ բերված դրույթները իրավական հիմնավորումներ չունեին:
Պաշտպանն ասաց, որ որոշումը ստանալուն պես, այն կբողոքարկեն:
Հիշեցնենք, օգոստոսի 2-ին, Երեւան-Սեւան ավտոճանապարհին պայթյուն էր տեղի ունեցել` Մելիք Մանուկյանին պատկանող ապակե տարաների գործարանի մոտ: Պայթյունից հետո իրավապահներն աշխատելիս են եղել դեպքի վայրում, երբ Մելիք Մանուկյանի մեքենան հեռացրել են այդ վայրից, քիչ անց`վերադարձրել: Այս դրվագով մեղադրանք է առաջադրվել երկու անձի`Մելիք Մանուկյանի եղբայր Ռոբերտ Մանուկյանին եւ Մարկոս Մարկոսյանին: Իսկ պայթյունի առթիվ քննություն է իրականացվում` սպանության փորձի եւ պայթուցիկ նյութեր պահելու հոդվածներով: Կալանավորվել է 3 անձ:
Կարդացեք նաև
Ռոբերտ Մանուկյանին մեղադրանք է առաջադրվել ՀՀ քրեական օրենսգրքի 316 հոդվածով` ոստիկանության աշխատակցին դիմադրություն ցույց տալը: Ըստ մեղադրանքի, Մելիք Մանուկյանը միայնակ 6 ոստիկանի ծեծի է ենթարկել, երբ նրան փորձել են բերման ենթարկել:
Հիշեցնենք, Ռոբերտ Մանուկյանը բերման է ենթարկվել դեպքի օրը, եղբորը` Մելիք Մանուկյանին պատկանող Range Rover մակնիշի ավտոմեքենան դեպքի վայրից հեռացնել դրդելու կասկածանքով: Ռոբերտ Մանուկյանը ձերբակալվել է: Կոտայքի մարզի ընդհանուր իրավասության դատարանը ձերբակալման որոշումն անօրինական է համարել ու նրան ազատ արձակել: Ինչից հետո, Քննչական կոմիտեն Մանուկյանին մեղադրանք է առաջադրել`ոստիկաններին ծեծի ենթարկելու, ինչպես նաև արդարադատության իրականացմանը կամ քննությանը խոչընդոտելու հոդվածներով ու կալանավորելու միջնորդություն ներկայացրել դատարան:
Նելլի ԳՐԻԳՈՐՅԱՆ
