Ինչպես տեղեկացրել էինք, այսօր Երեւանի ընդհանուր իրավասության դատարանում (Շենգավիթի նստավայր) ՀՀ երկրորդ նախագահ Ռոբերտ Քոչարյանի եւ մյուսների գործով դատական նիստին Ռոբերտ Քոչարյանի փաստաբանական թիմը ինքնաբացարկի միջնորդություն ներկայացրեց դատավոր Աննա Դանիբեկյանին: Որպես հիմնավորում՝ պաշտպանական կողմը նշում էր այն, որ դատավորը կանխակալ բացասական վերաբերմունք ունի Քոչարյանի նկատմամբ:
Յուրի Խաչատուրովի պաշտպան Միհրան Հակոբյանը նույնպես միացել էր միջնորդությանը՝ ասելով, որ Աննա Դանիբեկյանը բացասական վերաբերմունք ունի նաեւ Խաչատուրովի նկատմամբ:
Դատարանը հեռացել էր խորհրդակցական սենյակ՝ ինքնաբացարկի միջնորդության վերաբերյալ որոշում կայացնելու:
Կարդացեք նաև
Քիչ առաջ Աննա Դանիբեկյանը հրապարակեց իր որոշումը՝ մերժել ինքաբացարկի միջնորդությունը:
Դատավորը նաեւ հայտնեց, որ դատական նիստերին գտնվող անձինք պարտավոր են կարգը պահել, հակառակ դեպքում կարող են հեռացվել դատական նիստերի դահլիճից: Այս պարզաբանումն արվեց, քանի որ դահլիճում Քոչարյանի աջակիցները եւ ընդդիմախոսները սեռական բնույթի հայհոյանքներ էին տալիս միմյանց, վիրավորում, իրար ասում՝ լողացեք, ստրիպտիզ պարող եւ այլն:
Հռիփսիմե ՋԵԲԵՋՅԱՆ
