ՀՀ ոստիկանապետի ժամանակավոր պաշտոնակատար Արման Սարգսյանն այսօր այցելեց երեկ գիշերը վիրավորում ստացած ոստիկանին:
Նա լրագրողներին պատմեց, որ գիշերը Հաղթանակի զբոսայգու հարեւանությամբ ոստիկաններն իրենց ծառայությունն իրականացնելիս նկատել են կասկածելի երկու անձանց ու մոտեցել նրանց:
Անձանցից մեկին են կարողացել բռնել, մյուսը փախել է, ավելի ուշ մթության մեջ հարձակվել է ոստիկաններից մեկի վրա ու փորձել ազատել բռնված եղբորը: Ըստ պարոն Սարգսյանի՝ որոշակի քաշքշուկի ընթացքում նշված քաղաքացին հաջողացրել է պոկել ոստիկանի ատրճանակը, որը հատուկ պարանով ամրացված է եղել ոստիկանի վրա, եւ կրակոցներ արձակել. «Ենթադրում եմ` կենսական նշանակության օրգան է վնասվել, որովհետեւ մեկ կրակոց ունենք, զենքը դեռ չի հայտնաբերվել, կարողացել ենք պարզել այդ ստահակներին, եւ վերջիններս մեզ մոտ են, խոստովանում են: Քննության արդյունքներով բոլոր պատասխանները կտրվեն, հանգամանքները կպարզվեն»:
Արման Սարգսյանի խոսքով, նշված երկու քաղաքացիները օրինապաշտ քաղաքացիներ չեն եղել. «Մեր ոստիկանների օպերատիվ հոտառությունն իրենց չի դավաճանել, մոտեցել են ճիշտ մարդկանց, ցավում եմ, որ նման դեպք էր ստացվել»:
Կարդացեք նաև
Միջադեպի մասնակից երկու ոստիկանը հասցրել են դեպքի պահին կապ տալ այլ գործընկերների, նրանք, ըստ ոստիկանապետի պաշտոնակատարի, շատ արագ մոտեցել են, բայց. «Ցավոք, մեր գործընկեր Տիգրան Առաքելյանի կյանքը չի հաջողվել փրկել»:
Արման Սարգսյանը նաեւ ասաց, որ հանրային ընկալում պետք է ձեւավորվի, որ ոստիկանի վրա ձեռք բարձրացնելը նույնն է, թե պետության վրա ես ձեռք բարձրացնում, նման մարդիկ, որոնք կփորձեն այս կամ որեւէ այլ կերպ պետության վրա ձեռք բարձրացնել, խստագույնս պատժվելու են: Զոհված ոստիկանը աշխատանքային երկարամյա փորձ ուներ, իսկ վիրավորում ստացած ոստիկանը սկսնակ էր:
Պարոն Սարգսյանը նաեւ ասաց, որ զոհված ոստիկանը հետմահու կպարգեւատրվի: Իսկ վիրավորում ստացած ոստիկանը խոստացել է բարձրագույն կրթություն ստանալ, որ միջին խմբում պաշտոն ստանա, ըստ Արման Սարգսյանի՝ նրան կտրվի սպայական կոչում:
Արփինե ՍԻՄՈՆՅԱՆ
