Պետգույքի կառավարման վարչության պետ Նարեկ Բաբայանն այսօր լրագրողների հետ զրույցում տեղեկացրեց, որ Ծաղկաձորի «Գոլդեն փելես» հյուրանոցով արդեն հետաքրքրվողներ կան. «Մենք պատրաստվում ենք աճուրդի տարբերակով այն անել, հուսով ենք, կառավարության որոշման նախագիծը շուտով կընդունվի՝ աճուրդով վաճառքի վերաբերյալ»:
Նա ասաց, որ «Գոլդեն փելեսով» հետաքրքրվողները հիմնականում են հայազգի մեր քաղաքացիներն են, որոնք ապրում են ՀՀ-ից դուրս. «Նրանց թիվը կարծես ավելանում է: Նման խոսակցությունները նպաստում են դրան, կլինեն մարդիկ, ովքեր չեն հայտարարել իրենց հետաքրքրվածության մասին, միգուցե աճուրդ հայտարարելուց հետո ի հայտ գան»:
Տնտեսական հարցերի հանձնաժողովի նիստի ժամանակ պատգամավորները նույնպես հետաքրքրվում էին «Գոլդեն փելեսի» ճակատագրով: «Իմ քայլի» պատգամավոր Հայկ Սարգսյանը հարցրեց՝ հնարավոր չի՞ մինչեւ Նոր տարի այդ հարցը լուծել, գոնե վարձակալության տալ, որովհետեւ եթե հյուրանոցը գործի, գործող հյուրանոցն ավելի թանկ կարող են վաճառել, քան չգործողը:
Նարեկ Բաբայանն էլ պատասխանեց. «Հանձնման-ընդունման աշխատանքները հիմա ավարտվել են, աճուրդով վաճառք իրականացնելու նախագիծը հուսով եմ արագ կընդունենք ու նոյեմբերի վերջ կամ դեկտեմբերի սկիզբ հնարավոր կլինի աճուրդ իրականացնել: Ասեմ, որ հետաքրքրվողներ կան, 16,5 մլն դոլար է նախնական գինը: Մասնակիցներ հուսով եմ կլինեն, աճուրդը տեղի կունենա ու մութ սցենարների ստիպված չենք լինի անդրադառնալ: Հիմա ջեռուցումը կապահովի մինիմալ ձեւով, որ խնդիրներ չծագեն»:
Կարդացեք նաև
Հռիփսիմե ՋԵԲԵՋՅԱՆ
