ԲՀԿ խմբակցությունը բոյկոտեց ԱԺ նիստը ու խմբակցության պատգամավորները մեկը մյուսի հետևից դուրս եկան նիստերի դահլիճից, այնուհետեւ նաեւ ԱԺ շենքից:
Մինչ այդ լրագրողների հետ զրույցում ԲՀԿ պատգամավոր Գեւորգ Պետրոսյանը բացատրեց, թե ինչու են վիրավորվել:
Պարզվեց՝ բոյկոտի պատճառներից մեկը այն էր, որ ԱԺ փոխնախագահ Ալեն Սիմոնյանն ասել էր, թե ԲՀԿ-ն քանի՞ գլխանի է:
Կարդացեք նաև
Հիշեցնենք, որ արդեն երկու օր է՝ ԲՀԿ-ականները բանավիճում են թագաժառանգի ներդրման հետ կապված պատմության թեմայով:
Պետրոսյանի խոսքով՝ «Մենք այս ակցիան իրականացրեցինք, որ որոշ մարդիկ ուշքի գան ու հիշեն իրենք ինչ են աշխատում ու որն է իրենց գործառույթը: Ի՞նչ է նշանակում 2 մլրդ դոլարի ներդրումը վիժեցնել ու հետո պարոն Ծառուկյանը, ով իր անձնական կապերով է այդ ներդրումը ապահովել, հելնել իր վերաբերյալ վիրավորական արտահայտություննե՞ր անել: Սա խորհրդարան չի արդեն: Մենք հիմա փորձ ենք անում որոշ մարդկանց խելքի բերել: Ի՞նչ է նշանակում՝ քանի գլխանի եք, սա ի՞նչ արտահայտություն է, բա դո՞ւ քանի գլխանի ես: Էն, որ ասում է՝ մի հիշեք ով էր Պանիկովսկին հեղափոխությունից առաջ: Ստեղ մարդիկ կան, որոնց դեմքը որեւէ մեկը չի ճանաչել, բացի սեփական տնեցիքից, էն էլ կարող է էդ էլ բացառություն ունենա: Հիմա հելնում են՝ Ծառուկյանը էս, Ծառուկյանը էն…ամոթ է: Էս երկու օրը վերածվել է Ծառուկյանի անձնական քննադատության: Էդ մարդը պետական բեռը վերցնի իր վրա, բերի 2 մլրդ-ի ներդրում ուզենա անի, որ պոզ ու պոչ կպցնե՞ն, սա ի՞նչ թշնամանքի մթնոլորտ է, բացարձակ համերաշխության մթնոլորտ չի»:
Ըստ Պետրոսյանի, «Իմ քայլի» որոշ պատգամավորներ միտումնավոր սրացման են տանում: Մեր դիտարկմանը՝ սա քաղաքական մարմին է, եթե Ծառուկյանը բան է ասում, չե՞ն կարող հակադարձել, այդ կարգի արտոնյա՞լ է՝ Պետրոսյանը պատասխանեց. «Բացարձակ, մենք ողջունում ենք առողջ քննադատությունը, մարդը ուզում է ներդրում անի, պոզ ու պոչ են կպցնում»:
Հարցին, թե ինչու է Գագիկ Ծառուկյանն այսպես թոփ թեմա դարձել՝ Պետրոսյանը պատասխանեց, որ Ծառուկյանը միշտ էլ թոփ թեմա է եղել, հանրությանը հայտնի ամենաակնառու քաղաքական գործիչներից է, ի տարբերություն ոմանց, որ տարուց Նոր տարի է բարեգործություն անում, ինքը ամեն օր է անում:
Թե որքան կտեւի ԲՀԿ-ի բոյկոտը, դեռ իրենք էլ չգիտեն, Պետրոսյանն ասաց, որ խմբակցությունով կքննարկեն, բայց այսօր ԱԺ-կառավարություն հարցուպատասխանին չեն մասնակցի:
Հռիփսիմե ՋԵԲԵՋՅԱՆ
