Շաբաթ երեկոյան Ստեփանակերտի «Էլեգանտ» սրահում կայացել է «Արցախի հեղափոխական կուսակցության» հիմնադիր համագումարը: Ինչպես նշել է կուսակցության նորընտիր նախագահ Արթուր Օսիպյանը (որը Արցախի պետական համալսարանի նախկին դասախոս է և հայտնի է իշխանությունների հասցեին հնչեցրած ծայրահեղ քննադատությամբ), այս քաղաքական ուժը պահպանողական տիպի ձախ կենտրոնամետ ուժ է, ըստ որի քրիստոնեական նորմերը, հազարամյա ավանդույթները և մշակույթը հանդիսանում են այն միակ հուսալի հիմքը, որի վրա միայն կարող է բարգավաճել հայ հասարակությունը:
-Այնպիսի կարևորագույն պետական ինստիտուտների վերականգնման և ամրապնդման համար, ինչպիսիք են զինված ուժերը, կրթությունը և մշակույթը, անհրաժեշտ են ֆինանսական մեծ միջոցներ: Իմաստ չկա խոսել բարեփոխումների մասին և կազմել ծրագրեր, երբ հայտնի չէ, թե ինչ միջոցներով ենք իրականացնելու այդ ամենը: Դրա համար կուսակցությունը գտնում է, որ հասարակության առողջացման գործընթացն ու ամուր, ժողովրդավարական և իրավական պետության կերտումը պետք է սկսել հենց արմատական տնտեսական բարեփոխումներից, որոնց նպատակն է իրավական` անցնցում ու սահուն անցումը տնտեսության հիբրիդային մոդելին: Այլ խոսքով, տնտեսական հեղափոխությունը կայանում է խոշոր կապիտալի և ռազմավարական ռեսուրսների ազգայնացման մեջ: Իսկ դրանք, ինչպես ամրագրված է Արցախի Հանրապետության սահմանադրության մեջ, պատկանում են ժողովրդին,-նշել է Ա. Օսիպյանը:
Հիմնադիր համագումարը հաստատել է կուսակցության կանոնադրությունն ու ընդունել ծրագիրը, իրականացրել ղեկավար և վերահսկիչ մարմինների ընտրություն:
Կարեն ՄԻՐԶՈՅԱՆ
