«Առանց ֆունդամենտալ բարեփոխումների, մենք ի վիճակի չենք ժամանակակից աշխարհում լինել մրցունակ»,- այս կարծիքին է քաղաքագետ Արմեն Մինասյանը: Իսկ մրցունակ լինելու համար, ըստ քաղաքագետի, անհրաժեշտ է ճիշտ օրակարգ սահմանել:
Արմեն Մինասյանն իր մտորումներն այսօր բարձրաձայնեց «Ոսկանապատ» կենտրոնի կազմակերպած քննարկման ժամանակ:
Քաղաքագետը, ի դեպ, չի կիսում տեսակետը, որ 2018 թվականին Հայաստանում տեղի է ունեցել պետական հեղաշրջում. «2018-ին ընդամենը փողոցի ճնշման արդյունքում տեղի է ունեցել իշխանության փոփոխություն, համաձայն չեմ, որ դա պետական հեղաշրջում էր, որովհետև նոր իշխանությունը ձևավորվել է գործող խորհրդարանի կողմից՝ ՀՀ սահմանադրական նորմերի շրջանակներում: Մի կողմից, ճիշտ չէ, որ դա հեղափոխություն էր: Տարիուկես անցել է, և մենք ականատես չենք եղել որևէ հեղափոխական մոտեցման: Ընդհակառակը, բոլոր արատավոր երևույթները, որոնք կային մեր կյանքում, իներցիայի ուժով շարունակվում են, տեղ-տեղ ավելի խորանում ու տեսանելի են դառնում այն պատճառով, որ նախ նոր իշխանությունները չեն հասկանում, որ պրոբլեմների մեծ մասն օբյեկտիվորեն կա և ապա, իրենք չունեն փորձ դրանք լուծելու համար»:
Քաղաքագետի գնահատմամբ, կան հեղափոխությունից հիասթափվածներ, նույնիսկ նեղացածներ եւ այս բոլորին, պայմանական ասած «սևերին», միավորում է մի բան՝ նրանք դեմ են Նիկոլ Փաշինյանին և Փաշինյանի կառավարությանը: Բայց, եթե մենք այս իրավիճակում ունենանք արտահերթ ընտրություններ, խորհրդարանի կազմը շատ չի տարբերվելու ներկայիս կազմից, քանի որ անկախ նրանից՝ ինչ արդյունք կունենանք, այդ բոլոր խմբերը ձևավորված են լինելու «ինչ-որ բանին դեմ» սկզբունքով. «Մեզ պետք է մի փոքր համբերել, որպեսզի և իշխանության ճամբարում, և հակաիշխանականում տեղի ունեցող խմբավորումներն ավարտվեն ու գործ ունենանք բյուրեղացված, արդեն որոշակի շահերի խմբերի հետ, որոնք կունենան «հանունի» օրակարգ»:
Կարդացեք նաև
Նելլի ԳՐԻԳՈՐՅԱՆ
