Թբիլիիսում տեղի է ունեցել Վրաստանի, Ադրբեջանի և Թուրքիայի արտգործնախարարներ Դավիթ Զալկալիանիի, Էլմար Մամեդյարովի և Մևլութ Չավուշօղլուի 8-րդ եռակողմ հանդիպումը, որից հետո նրանք հանդես են եկել համատեղ հայտարարությամբ:
Հայտարարության մեջ նշվում է, որ կողմերը գոհունակություն են հայտնել աճող երկկողմ և եռակողմ գործակցությունից, և ևս մեկ անգամ ընդգծել, որ հավատարիմ են գործակցության ընդլայնմանը՝ հիմնված ռազմավարական գործընկերության, բարիդրացիական հարաբերություների, փոխադարձ հարգանքի և վստահության վրա:
Արտգործնախարարները հերթական անգամ վճռական աջակցություն են հայտնել երեք երկրների ինքնիշխանությանը, տարածքային ամբողջականությանը և ճանաչված միջազգային սահմաններին:
Այս առումով ընդգծել են, որ տարածաշրջանային հակամարտությունները հարված են հասցնում խաղաղությանը, անվտանգությանը, կայունությանը և տնտեսական զարգացմանը, ստատուս քվոն անընդունելի է և չի կարող շարունակական լինել, ինչպես նաև պահանջում է շուտափույթ կարգավորում խաղաղ ճանապարհով:
Կարդացեք նաև
Կողմերը հերթական անգամ կարևորել են Աբխազիայում և Ցխինվալում, ինչպես նաև Լեռնային Ղարաբաղում հակամարտությունների կարգավորումը՝ հիմնված միջազգային իրավունքի նորմերի, մասնավորապես, ինքնիշխանության, տարածքային ամբողջականության և միջազգայնորեն ճանաչված պետական սահմանների անձեռնմխելիության վրա, ինչպես նաև համաձայն ՄԱԿ, ԵԱՀԿ և ԵՄ համապատասխան բանաձևերի և դրույթների: Կողմերը նաև ընդգծել են փախստականների և հարկադիր տեղահանվածների անվտանգ վերադարձի կարևորությունը:
Արտգործնախարարները ևս մեկ անգամ ընդգծել են եռակողմ գործակցության կարևորությունը պաշտպանական ոլորտում, ինչպես որ նշված է 2018թ. ստորագրված փոխգործակցության հուշագրում, ընդգծել են եռակող զորավարժությունների կարևորությունը, ինչպես նաև գործակցությունը պաշտպանական արդյունաբերության ոլորտում, այդ թվում բարձր մակարդակով:
Պատրաստեց՝ Վիկտորյա ԱՆԴՐԵԱՍՅԱՆԸ
