«Վարչապետը իջնում էր ձեզ հանդիպելու, սակայն, երբ տեսավ, որ փողոցը փակել եք, հետ դարձավ»,-զոհված զինծառայող, ազգությամբ եզդի Արթուր Աջամյանի հարազատներին ասաց վարչապետի օգնականը՝ Նաիրի Սարգսյանը:
Զինվորի հարազատները այսօր առավոտից կառավարության առաջ ցույց էին անում՝ պահանջելով հանդիպում վարչապետի հետ: Նաիրի Սարգսյանը զինվորի հարազատներին հորդորեց՝ ինչ հարց ունեն իրեն փոխանցեն, ինքն էլ՝ վարչապետին: Սա հունից հանեց զինվորի հարազատներին, որոնք հակադարձեցին՝ փողոց փակելը Նիկոլ Փաշինյանից ենք սովորել. «Էդ ինչի՞ այն ժամանակ իրեն կարելի էր փողոց փակել, մեզ չի՞ կարելի: Իրա հանած օրենքներն են»:
Նաիրի Սարգսյանն ի պատասխան ասաց. «Դա լրիվ ուրիշ իրավիճակ է, այլ նպատակներով»:
Կարդացեք նաև
Ցույցի մասնակիցները չհամաձայնեցին ո՜չ Նաիրի Սարգսյանի հետ վերեւ բարձրանալ ո՜չ էլ փողոցը բացել: Երթեւեկությունը վերականգնելու համար ոստիկանները ստիպված եղան ուժով նրանց հեռացնել ճանապարհից:
Այդ ընթացքում զոհված Արթուր Աջամյանի մոր ինքնազգացողությունը վատացավ, շտապօգնության բժիշկները նրան բուժօգնություն ցուցաբերեցին:
Երիտասարդ ցուցարարները ոստիկանների՝ փողոցը բացելու պահանջին չէին ենթարկվում եւ պառկում էին ավտոմեքենաների առաջ՝ արգելելով վարորդների տեղաշարժը:
Մանրամասները՝ տեսանյութում
Լուսինե ԲՈՒԴԱՂՅԱՆ
