Երեկ Երեւանի ավագանու նիստը տեւել է մոտ 12 ժամ: Արդեն վերջին ժամերին, երեկոյան ուշ նիստը թեժացել էր: Ավելի ճիշտ, «Լույս» խմբակցության անդամների եւ Կենտրոն վարչական շրջանի նորանշանակ ղեկավար Ավետ Պողոսյանի միջեւ թեժ «խոսակցություն» եղավ, տեղ-տեղ նույնիսկ վիրավորանք:
Դեռ կեսօրին, նիստի մեկնարկից 1-2 ժամ անց «Լույս» խմբակցության ղեկավար Դավիթ Խաժակյանը ելույթ ունեցավ եւ անդրադարձավ Ավետ Պողոսյանի՝ լրատվամիջոցներից մեկին տված հարցազրույցին, ապա որպես պատասխան հիշեցրեց Նիկոլ Փաշինյանի՝ դեռ ընդդիմադիր պատգամավոր եղած ժամանակ արած խոսքերը. «…Ես ձեզ հետ բանավեճ չունեմ, որովհետեւ դուք չափազանց փոքր ֆիգուր եք ձեր հետ բանավեճի մեջ մտնելու համար։ Իմ բանավեճը ձեր քաղաքական ծնողների հետ է, էնպես որ, ձեզ խորհուրդ կտամ ընդհանրապես ոտքի տակ չընկնել»։
Ավետ Պողոսյանն էլ արդեն երեկոյան պատասխանելով «Իմ քայլ»-ից ավագանու անդամի հարցերին՝ անդրադարձավ նաեւ Խաժակյանի ելույթին:
Պողոսյանը խոսելով, թե ինչ սկզբունքով է աշխատելու ավագանու հետ, նշեց. «Ավագանու աշխատանքի հետ կապված մի հանգամանք կա, որը ցավոք, ուշադրության չի արժանացել վերջին շրջանում, դա «Լույս» խմբակցությունում առկա ճգնաժամն է, որը շատ բարդ իրավիճակ կարող է ստեղծել ոչ միայն ավագանու աշխատանքների համար, այլ նաեւ ընդհանրապես քաղաքական դաշտում: Գոյություն ունի ե՛ւ համայնքային, ե՛ւ համապետական մակարդակում հասարակության, ե՛ւ համայնքային, ե՛ւ համապետական իշխանությունների խիստ կոնսոլիդացիա. դա են վկայում ընտրությունների արդյունքներն ու բոլոր հարցումները: Եվ հիմնական պայքարը այն փոքր հատվածի ներսում է գնում: Եվ այնտեղ շատ վատ գործընթացներ են տեղի ունենում՝ քաղաքական թրաֆիքինգի դեպքեր են գրանցվում, ընդհուպ մինչեւ քաղաքական անասնագողության դեպքեր են գրանցվում այդ դաշտում: Այդ առումով այն ճգնաժամը, որն առկա է «Լույս» դաշինքում՝ ես ուզում եմ կոչով դիմել իմ գործընկերներին ՝ որեւէ պարագայում չի կարելի այդ ճգնաժամն օգտագործել նեղ քաղաքական նպատակների համար: Մենք ստիպված ենք եւ պարտավոր ենք օգնել «Լույս» դաշինքի մեր գործընկերներին՝ հաղթահարելու այդ ճգնաժամը, որովհետեւ այստեղ այլ հարց էլ է առաջանում՝ թե ո՞վ է այդ քաղաքական պատասխանատուն այդ ֆրակցիայի, իսկ եթե չկա…»:
Կարդացեք նաև
Միջամտեց եւ տեղից ռեպլիկ արեց «Լույս» դաշինքի անդամ Անի Խաչատրյանը. «Քաղաքական խոսելու իրավունք դուք չունեք, առավել եւս ֆրակցիան քննարկելու»:
Ռեպլիկին զուգահեռ Պողոսյանը շարունակեց.«Իսկ եթե չկա քաղաքական պատասխանատու, ապա մենք գործ ունենք ոչ թե ֆրակցիայի հետ, այլ խմբի, տվյալ դեպքում՝ խմբակի: Քանի որ քաղաքական պատասխանատվության առումով, ըստ էության, իրենց դաշինքի լիդերն արդեն տեւական ժամանակ է քաղաքականությամբ չի զբաղվում, իսկ դաշինքի մյուս անդամը վերջերս պատասխանատվությունը հանեց իրենց կուսակցության վրայից, ապա մենք այստեղ կրկնակի ուշադիր պետք է լինենք, եւ թույլ չտանք, ոչ հանկարծ որեւէ պարագայում այլ կեղտոտ նպատակներով օգտագործվի: Ես իմ աջակցությունն եմ հայտնում «Լույս» դաշինքի իմ գործընկերներին, դուք հանգիստ եղեք, դուք անտեր չեք մնալու: Դրական միտումներ էլ եմ նկատում՝ բավական շատ երիտասարդներ կան, որոնք շատ լավ ինքնադրսեւորվում են: Այնքան երիտասարդն են, որ երբ ես իմ քաղաքական գործունեությունն էի սկսում, նրանցից ոմանք շապիկով եւ քորոցով էին յոլա գնում, իսկ հիմա կարողանում են վարչապետի խոսքերը մեջբերել: Ես շնորհավորում եմ նրանց այդ կապակցությամբ: Քաղաքական գործունեությամբ զբաղվող մարդը, սովորաբար, իր լիդերի մտքերն է ցիտում, եթե հակառակորդի լիդերի մտքերն է ցիտում, կարելի է ենթադրել, որ սեփական լիդերը արժանահիշատակ մտքեր չի արտահայտել: Տվյալ դեպքում վարչապետ Փաշինյանն այդ խոսքերն ասել էր լեգիտիմություն չունեցող, հանցավոր, լկտի ռեժիմի դեմ պայքարի ենթատեքստում, որոնք այստեղ տեղին չեն, քանի որ տվյալ դեպքում մենք գործ ունենք լեգիտիմություն ունեցող, օրինապաշտ քաղաքային եւ հանրապետական իշխանության հետ»,-ասաց Պողոսյանը:
Նա վստահեցրեց՝ Խաժակյանն իր հարցազրույցը մեջբերելով՝ 180 աստիճան հակառակ է հասկացել դրա իմաստը. «Այն է՝ մթնոլորտը, որ կար ավագանու նիստերին՝ ագրեսիվ պահվածքի հետ կապված, ես առաջարկում էի կոնստրուկտիվ հուն տեղափոխել եւ ավելի կոնստրուկտիվ ճանապարհով գնալ, ինչը ես նորից անում եմ: Ես կարծում եմ, այս կոչը նախորդի նման թարս չի հասկացվի: Ես իմ ձեռքը մեկնում եմ, հակառակ դեպքում մենք պատրաստ ենք բոլոր լեզուներով խոսակցությանը: Ուղղակի մենք ուզում ենք կոնստրուկտիվիզմի լեզվով խոսել»:
Դավիթ Խաժակյանն էլ պատասխանեց. «Իմ մանկության տարիների գրվածքներից էր, ինձ դրա մասին պատմել են, ասում են այդ խոսքերի հեղինակը Վանո Սիրադեղյանն է: Նա իմ քաղաքական առաջնորդը չէ բնավ, պարզապես լսել եմ, եւ մի վիպակ ունի, կոչվում է՝ «Գյադաների ժամանակը», եւ այդ անասնագողության վերաբերյալ ձեր խոսքերը, որոնք անձնականի դաշտը միանշանակորեն անցան, ձեր քաղաքական վերլուծությունները… դա երեւի, ավելի արժանապատիվ կլիներ, երբ անեիք՝ մնալով Հայաստանում ձեր քաղաքական գործունեությունից հետո, որովհետեւ 2008-ի բուռն իրադարձություններից հետո, 12-ից հետո ձեր բուռն քաղաքական իրադարձություններից հետո, որոնց հուշերով երեւի դուք հիմա ապրում եք, դուք լքեցիք երկիրը եւ վերադարձաք, երբ ամեն ինչ արդեն պատրաստ էր եւ կարելի էր գալ պաշտոն զբաղեցնել: Մենք ընդունում ենք ձեր կոնստրուկտիվիզմով առաջնորդվելու առաջարկը, միանշանակորեն: Եվ մենք կոնստրուկտիվորեն զբաղվելու ենք ձեր հետ, եւ այն շինմոնտաժային աշխատանքները, որոնք հնարավոր է իրականացնել այդ կոնստրուկտիվի շրջանակներում, մենք կիրականացնենք: Ես արձանագրեցի, որ դուք անցաք անձնավորվածության սահմանը եւ չտրվեցիք ոտքի տակ չընկնելու կոչին: Այդ բառապաշարը՝ ես մեջբերեցի վարչապետի խոսքերը, որ չստացվի թե ես ձեզ վիրավորում եմ, որովհետեւ այն դիտարկումները, թե դրանք վիրավորական արտահայտություններ են, դրանք ինձ չեն ուղղված, այդ հայտարարությունները քաղաքական էին եւ դրանք արել էր ընդդիմադիր ժամանակ Նիկոլ Փաշինյանը:
Բայց ինչ էլ ասեք, խնդրում եմ իմ գործընկեր Անի Խաչատրյանին էլ զուսպ մնալ, թեպետ հասկանում եմ, որ ինքը կարող է ձեզ գեղեցիկ բառեր ձոնել: Հիմա այդպես է՝ գյադաների ժամանակն է, կարող է մարդ հելնել, ելույթ ունենալ, ասենք ինքը վարչական շրջանի ղեկավար է, հայեցողական պաշտոն ունեցող է, ինքը ի՞նչ իմանա ավագանին ինչ է, ինչպիսի հարգանքով է պետք մոտենալ: Նման արտահայտություններ, քաղաքական վերլուծություններ անելը բնորոշ է, այո՛, գյադաների ժամանակաշրջանին: Եթե դուք մեզ այդ հուն եք մղում, խնդիր չկա, մենք Երեւանի ժարգոնով ձեզ հետ չենք խոսելու, Լոռվա բարբառով էլ չենք խոսելու, ձեզ հետ մենք խոսելու ենք քաղաքական լեզվով, մտերմաբար, որովհետեւ վերադարձաք հեղափոխությունից հետո, պաշտոն զբաղեցրեցիք: Ես հասկանում եմ՝ դուք կոմպլեքս ունեք, որովհետեւ պարոն Վիկտոր Մնացականյանը լավ թաղապետ էր եւ հիմա դուք պետք է մնաք այդ ծանրաձողի տակ, որը նա բարձրացրել էր: Ձեր աշխատակազմն ինձ արդեն ասում է, որ ակնհայտ է, այդ ծանրաձողի տակ է մնալու Ավետ Պողոսյանը: Բայց մենք ամենայն հարգանքով փորձելու ենք ձեզ աջակցել, որ դուք վարչական շրջանում հնարավորինս հաջողեք եւ արժանանաք Մնացականյանի բարձրացրած ծանրաձողի ամենափոքր կշռաքարին եւ մենք ուրախ կլինենք, որ դուք հաջողեք:
«Գյադաների ժամանակ» արտահայտությունից խնդրում եմ չնեղվեք: Ես մեջբերեցի Վանո Սիրադեղյանի վիպակից, եւ նա բնավ իմ քաղաքական առաջնորդը չէ, իմ քաղաքական առաջնորդն իրեն թույլ չի տալիս նման արտահայտություններ: Բայց ասում է՝ եթե որեւէ մեկը կփորձի անդրադառնալ մեզ վատ խոսքով, պետք է ստանա իր պատասխանը՝ մեկի դեմ՝ մի քանիսը: Դրա համար որքան դուք այդ մի քանիսն ավելացնեք, այդքան մենք երկրաչափական պրոգրեսիայով կավելացնենք եւ կտեսնենք՝ այդ ծանրաձողի տակ մնացողն ով է լինելու»: Խաժակյանն իր խոսքն ավարտելուց հետո, քաղաքապետին դիմելով ասաց, որ դա հարց չէր, եւ իր կարծիքով չարժե Պողոսյանին խոսք տրամադրել:
Քաղաքապետ Հայկ Մարությանն էլ ասաց՝ այն կարծրատիպը, թե վարչական շրջանի ղեկավարն իրավունք չունի քաղաքական խոսք ասել, այդպես չէ. «Այստեղ նստած են ՀՀ ազատ եւ հպարտ քաղաքացիներ, ունեն բոլոր իրավունքները եւ խոսքի ազատությունը: Ամեն մեկն իրեն տրված հարցին կարող է ազատորեն, ինչպես մտածում է՝ քաղաքական է, քաղաքացիական է, կարող իր ուզած ձեւով արտահայտվել»:
Պողոսյանն էլ կարճ արձագանքեց Խաժակյանին՝ նշելով. «Այն խոսքերը, որ Փաշինյանը ասել էր ընդդիմադիր ժամանակ կոռումպացված իշխանությանը, չի կարելի ասել գերլեգիտիմ, հասարակական աջակցություն ունեցող իշխանությանը: «Գյադաների ժամանակը»՝ դա Վանո Սիրադեղյանի պատմվածքների ժողովածուն է: Խորհուրդ եմ տալիս կարդալ: Բայց ես ընդունում եմ ձեր մարտահրավերը՝ կոնստրուկտիվիզմի ձեր մոդելի: Ես հուսով եմ, որ այնուամենայնիվ, փորձենք ձեզ իսկապես կոնստրուկտիվ հուն բերել: Նորից եմ խորհուրդ տալիս՝ հաղթահարեք «Լույս» խմբակցությունում առկա քաղաքական ճգնաժամը եւ պատասխանատվության խնդիր դրեք»:
Նելլի ԲԱԲԱՅԱՆ
