Ինչպես արդեն տեղեկացրել ենք, «Էրեբունի Պլազա» բիզնես կենտրոնում ժամը 14.40-ի սահմաններում հնչել են կրակոցներ:
ՀՀ ոստիկանության լրատվության պետ Աշոտ Ահարոնյանը լրագրողների հետ զրույցում հայտնեց, որ շենքի ներսում վիրավորներ, զոհեր կամ պատանդ վերցված քաղաքացիներ չկան: Նա տեղեկացրեց, որ զինված անձը հանձնել է զենքը, անձամբ ոստիկանության պետի ժամանակավոր պաշտոնակատարի հետ բանակցություններից հետո:
Gunmen opened fire at the Erebuni Plaza Business Center in Yerevan, Armenia
Նշենք, որ «Էրեբունի Պլազա» բիզնես կենտրոնում գտնվում է ՀՀ երկրորդ նախագահ Ռոբերտ Քոչարյանի գրասենյակը, «Հինգերորդ ալիք» հեռուստաընկերության խմբագրությունը, «Yerevan today»-ի խմբագրությունը, միջազգային մի շարք կազմակերպությունների գրասենյակներ: Իսկ բիզնես կենտրոնի հարակից տարածքում գտնվում է ՄԱԿ-ի գրասենյակը: ՄԱԿ-ի գրասենյակի աշխատակիցների փոխանցմամբ՝ աշխատակիցներին և հյուրերին տեղեկացվել է կատարվածի մասին, և նրանք տարհանվել են:
Gunmen opened fire at the Erebuni Plaza Business Center in Yerevan, Armenia
Aravot.am-ի հետ զրույցում բիզնես կենտրոնում տեղակայված որոշ միջազգային կազմակերպությունների աշխատակիցներ հայտնեցին, որ կրակոցները տեղի են ունեցել առաջին հարկում, նույնիսկ զինված անձը ցանկացել է պատանդ վերցնել առաջին հարկի աշխատակիցներին: Այժմ իրենք շենքի ներսում են, չեն թույլատրում շենքից դուրս գալ:
Կարդացեք նաև
«Yerevan today»-ի աշխատակիցները լրագրողների հետ զրույցում հայտնեցին, որ 14.40-ի սահմաններում, երբ հայտնի է դարձել, որ շենքում անհայտ անձ կա, որը զինված է և փորձում է մուտք գործել երկրորդ նախագահ Ռոբերտ Քոչարյանի գրասենյակ, իրենց այդ ժամանակ հորդորել են բարձրանալ շենքի ավելի բարձր հատված, քանի որ զինված անձը փորձում է վերև բարձրանալ:
Gunmen opened fire at the Erebuni Plaza Business Center in Yerevan, Armenia
ՀՀ երկրորդ նախագահ Ռոբերտ Քոչարյանի գրասենյակի ղեկավար Վիկտոր Սողոմոնյանը լրագրողների հետ զրույցում նշեց, որ կրակոցներն արձակվել են ընդմիջման ժամին. ինքը շենքի ներսում չի եղել: Հարցին՝ որքանո՞վ են կրակոցները կապված ՀՀ երկրորդ նախագահի և նրա գրասենյակի հետ, Վիկտոր Սողոմոնյանը պատասխանեց. «Որքանով է այս միջադեպը կապված Ռոբերտ Քոչարյանի գրասենյակի հետ, ես հիմա չգիտեմ, կգերադասեմ տեղեկություններն ամբողջացնել: Եթե այն մեզ ինչ-որ բանով առնչվում է, կմեկնաբանենք, և ես հայտարարություն կտարածեմ: Հիմա որևէ տեղեկություն չունեմ»:
Gunmen opened fire at the Erebuni Plaza Business Center in Yerevan, Armenia
Հիշեցմանը՝ Ռոբերտ Քոչարյանի աջակիցները կարծիքներ են հնչեցրել, թե սա ուղղված է Ռոբերտ Քոչարյանի գրասենյակին, այս առիթով Վիկտոր Սողոմոնյանն ասաց, որ ինքը պաշտոնական անձ է և նման ասեկոսեներ մեկնաբանել չի կարող:
Նա փոխանցեց, որ բիզնես կենտրոնի անվտանգությունն ապահովում է բիզնես կենտրոնի անվտանգության ծառայությունը, որն իրենց հետ կապ չունի:
Gunmen opened fire at the Erebuni Plaza Business Center in Yerevan, Armenia
Նշենք, որ այս պահին ոստիկանները պատ են կազմել բիզնես կենտրոնի առաջ, դեպքի վայրում աշխատում են նաև շտապօգնության աշխատակիցները: Այս պահին բիզնես կենտրոնի աշխատակիցները ոստիկանների ուղեկցությամբ դուրս են գալիս շենքից:
Տաթև ՀԱՐՈՒԹՅՈՒՆՅԱՆ
Հ. Գ. ՀՀ ոստիկանության՝ այս առնչությամբ տարածած պաշտոնական հաղորդագրությունն է. «Ժամը 14.40-ին ոստիկանությունում ահազանգ է ստացվել, որ «Էրեբունի պլազա» հյուրանոցում զինված անձ կա, որը կրակում է։ Անմիջապես դեպքի վայր են մեկնել ոստիկանության ղեկավար կազմն ու օպերատիվ խմբեր։
Ոստիկանության ղեկավար կազմը՝ ոստիկանության պետի պաշտոնակատար Արման Սարգսյանի գլխավորությամբ բանակցություններ է վարել զինված տղամարդու հետ, ինչից հետո անձը հանձնել է հրազենը։
Տղամարդը ոստիկանության պետի պաշտոնակատարի ուղեկցությամբ, նրա ծառայողական մեքենայով տեղափոխվել է ոստիկանություն։
Վնասվածքներ ստացած քաղաքացիներ չկան։
Դեպքի բոլոր հանգամանքները պարզվում են»:
