ՀՀ Վերաքննիչ դատարանում, դատավոր Արմեն Դանիելյանի նախագահությամբ, այսօր քննվում էր առաջին ատյանի դատարանի որոշման դեմ բերված դատախազության բողոքը: Առաջին ատյանի դատարանը, հիշեցնենք, բավարարել էր Ռոբերտ Քոչարյանի պաշտպանների միջնորդությունը` «Մարտի 1-ի» գործի նյութերին ամբողջությամբ ծանոթանալու վերաբերյալ: Դատախազությունը բողոքել էր առաջին ատյանի դատարանի որոշումը:
Այսօրվա նիստում Ռոբերտ Քոչարյանի փաստաբան Հովհաննես Խուդոյանը նախագահող դատավոր Արմեն Դանիելյանի ինքնաբացարկի մասին միջնորդություն ներկայացրեց: Հիմնավորումները վերաբերվում են դատավորի սուբյեկտիվ լինելուն:
Ռոբերտ Քոչարյանի պաշտպանական թիմի անդամներից Արամ Վարդեւանյանն էլ գործընկերոջ բերած փաստարկներին հավելեց` նույն գործով բերված նախկին բողոքներով դատավորի կողմից ավելի վաղ թույլ տրված խախտումները: «Խոսքը ձեր սուբյեկտիվության մասին է»,-ասաց պաշտպանը:
Հովհաննես Խուդոյանը հիմնավորումներում նաեւ լրատվամիջոցների հրապարակումներն էին այն մասին, որ ԲԴԽ ղեկավարը հայտարարում է մյուս դատավորներից որոշների նախընտրելիության մասին: Նախընտրելիների թվում նաեւ Արմեն Դանիելյանն է:
Դատախազ Պետրոս Պետրոսյանն իր խոսքում նախ նկատեց` փաստաբանները գործում են «դատարանին վիրավորել, հետո հայտարարել, որ դատավորը չի կարող գործը քննել, քանի որ սուբյեկտիվ է գործում» սկզբունքով: Դատախազը պնդեց`դատավորի սուբյեկտիվության մասին պաշտպանական կողմի բերած պնդումները հիմնավորված չեն, իրականությանը չեն համապատասխանում:
Այլ մանրամասները`քիչ ուշ`տեսանյութում:
Հիշեցնենք, որ ավելի վաղ դատավոր Արմեն Դանիելյանը չեղարկել էր առաջին ատյանի դատարանի որոշումը` Ռոբերտ Քոչարյանին Արցախի գործող եւ նախկին նախագահների անձնական երաշխավորությամբ ազատելու մասին: Այդ բողոքը քննելիս Արմեն Դանիելյանի նախագահությունը նշանավորվել էր աննախադեպ իրադարձությամբ՝ դատավորը պաշտպանական կողմին թույլ չէր տվել ելույթ ունենալ:
Իր ինքնաբացարկի վերաբերյալ միջնորդության որոշումը Արմեն Դանիելյանը կհրապարակի փետրվարի 3-ին ժամը 10-ին:
Նելլի ԳՐԻԳՈՐՅԱՆ
