Գյումրու ինֆեկցիոն հիվանդանոցի ինֆեկցիոն բաժանմունքի վարիչ Կարինե Հովհաննիսյանը մեզ հետ զրույցում տեղեկացրեց, որ իրենց մոտ տվյալ պահին (խոսքը 12․30 մասին է) կասկածելի դեպքեր չկան, թեև իրադրությունը ժամ առ ժամ կարող է փոխվել։
«Տեղամասային պոլիկլինիկաները իրազեկված են, եթե կասկածելի դեպք է լինում, այսինքն՝ եթե լինում են մարդիկ, որոնք եկել են անբարենպաստ երկրներից կամ ունեցել են կոնտակտ մեկի հետ, որը որ եղել է օդանավակայանում, կամ զբոսաշրջիկ է կամ այլ երկրի քաղաքացի է, իրենք համարվում են կոնտակտավորներ։ Նման դեպքերում իրենք դիմում են տեղամասային բժշկին, գանգատ լինելու դեպքում, այսինքն` ջերմություն, կոկորդի քերոց, հազ, նման դեպքում համարվում է կասկածելի դեպք։
Նման դեպքերում ոչ թե ինֆեկցիոն հիվանդանոց են ուղղորդում, այլ անմիջապես զանգում են Սանէպիդ կայանի աշխատակիցներին, որպեսզի վերցվի նմուշառում։ Եթե կասկածելի դեպք է գնահատվում, հիվանդը իրավունք չունի նստել հասարակական տրանսպորտ կամ տաքսի և քաղաքով պտտվի կամ գա ինֆեկցիոն հիվանդանոց։ Նա իզոլացվում է․ գոյություն ունեն մեկուսարաններ, բոլոր պոլիկլինիկաները իրազեկված են, որպեսզի պատրաստեն մեկուսարաններ»,-ասաց Կարինե Հովհաննիսյանը։
Կարդացեք նաև
Վերջինս ասում է, որ խուճապային տրամադրություններ ինքը չի նկատում, որովհետև իրենք նման արտակարգ ռեժիմով աշխատում են դեռ նոյեմբերի վերջերից։
Նա նաև հերքում է Գյումրիում պտտվող այն լուրերը, թե Չինաստանից վերադարձած մեր համաքաղաքացու մոտ կորոնավիրուս է ախտորոշվել, սակայն թաքցնում են։
«Նման բան գոյություն չունի, իրենք օդանավակայանում ջերմաչափվել են, իրենց անուն-ազգանունները կան, իրենց նկատմամբ հսկողությունը սահմանվում է 14 օրից ոչ պակաս»։
Ի դեպ, Շիրակի մարզում չկան ռեֆերենս լաբորատորիաներ, թեստեր ևս չեն տրամադրվել․ դրանք տրամադրվում են միայն նման լաբորատորիաներին։
Նունե ԱՐԵՎՇԱՏՅԱՆ
