Հանրային առողջապահության ներկայացուցիչները և կառավարությունները պետք է ոչ միայն աշխատեն կանխել կորոնավիրուսի տարածումը, այլ նաև պայքարեն վիրուսի վերաբերյալ ապատեղեկատվության տարածման դեմ: Այս մասին հայտարարել է ԵԱՀԿ-ի Խորհրդարանական վեհաժողովի ապատեղեկատվության և քարոզչության վերաբերյալ հատուկ զեկուցող Օսկար Մինան:
Կորոնավիրուսի բռնկումը առաջին լուրջ ճգնաժամն է հանրային առողջապահության բնագավառում ժամանակակից սոցիալական ցանցերի դարաշրջանում, իսկ վիրուսի մասին կեղծ լուրերի արագ տարածումն արդեն մտահոգել է Առողջապահության համաշխարհային կազմակերպությանը և մի քանի երկրների կառավարությունների, որոնք այդ երևույթն անվանել են «ինֆոդեմիա»:
Մինայի խոսքով՝ այսօր համացանցում, սոցիալական ցանցերում շրջանառվում են կեղծ լուրեր պատվաստանյութերի մասին, դավադրության զանազան տեսություններ, իսկ նման ապատեղեկատվությունը խոչընդոտում է վիրուսը կասեցնելուն ուղղված ջանքերին՝ տարածելով խուճապ, անօգնականություն և խտրականություն մի ժամանակաշրջանում, երբ երկրների միջև համերաշխությունն ու համագործակցությունն անհրաժեշտ են մարդկային կյանքեր փրկելու համար:
«Վատ տեղեկատվության դեմ լավագույն միջոցը լավ տեղեկատվությունն է»,-ընդգծել է նա՝ միջազգային կազմակերպություններին, կառավարություններին, մեդիաընկերություններին կոչ անելով աշխատել, որպեսզի երաշխավորվի ստույգ և հավաստի տեղեկատվության լայն տարածումը: Նա նաև կոչ է արել հետևել բացառապես գիտական համայնքի և իրավասու մարմինների ցուցումներին:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
