Ադրբեջանի հարցով ԵԽԽՎ զեկուցողներ Շտեֆան Շենախը և Ռոջեր Գեյլը իրենց մտահոգությունն են հայտնել այն փաստի առնչությամբ, որ ադրբեջանական իշխանությունները կորոնավիրուսի համավարակի դեմ պայքարի պատրվակով հետապնդում են իրենց քննադատողներին: Համազեկուցողներն անհանգստացած են նաև այն բանտարկյալների անվտանգության համար, որոնց միջազգային հանրությունը համարում է քաղբանտարկյալներ:
«Մենք բազմաթիվ հաղորդագրություններ ենք ստացել այն մասին, որ կառավարության ընդդիմախոսները ենթարկվում են լայնամասշտաբ ճնշումների, սահմանափակվում է նրանց խոսքի ազատության իրավունքը, այդ թվում՝ ինտերնետի հասանելիությունը՝ COVID-19 համավարակի դեմ սահմանված միջոցառումների պատրվակով»,-ասվում է հայտարարության մեջ:
ԵԽԽՎ համազեկուցողները նաև ընդգծել են, որ կարանտինի կանոնները խախտելու կամ ոստիկանության հրահանգները չկատարելու պատրվակով ձերբակալվել են ընդդիմության ավելի քան 15 ակտիվիստներ, լրագրողներ: «Մասնավորապես, մեզ հուզում է հաղորդագրություններն այն մասին, որ ընդդիմադիր Ազգային ճակատ կուսակցության ղեկավար Ալի Քերիմլին դե-ֆակտո տնային կալանքի մեջ է գտնվել, նա զրկված է եղել ինտերնետից, հեռախոսից, քանի որ դրանք արգելափակվել էին»:
ԵԽԽՎ-ն Ադրբեջանի իշխանություններն կոչ է արել կորոնավիրուսի համավարակը չօգտագործել որպես պատրվակ քաղաքական ընդդիմությանը ճնշելու համար, ինչպես նաև հավատարիմ մնալ միջազգային պարտականություններին՝ ուղղված խոսքի ազատության ապահովմանը:
Կարդացեք նաև
Պատրաստեց` Վիկտորյա ԱՆԴՐԵԱՍՅԱՆԸ
