ՀՀ ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի հանձնաժողովի՝ կորոնավիրուսի տարածման հետեւանքով մարզաշխարհում ստեղծված իրավիճակի վերաբերյալ հրավիրված աշխատանքային քննարկման ժամանակ պատգամավոր Արսեն Ջուլֆալակյանը մարզաշխարհի ներկայացուցիչներին առաջարկեց խոսել մենապայքարային մարզաձեւերի հավաքականներում տիրող իրավիճակի մասին:
Հայաստանի ձյուդոյի ֆեդերացիայի նախագահի տեղակալ, գլխավոր քարտուղար, «Օլիմպավանի» տնօրեն Թաթուլ Հովհաննիսյանը ձեւակերպեց հստակ. «Կոնտակտային մարզաձեւերը շատ վատ վիճակում են: Այնտեղ հնարավոր չէ հնարք կատարել առանց միմյանց բռնելու, գրկելու, ինչը կորոնավիրուսի պայմաններում ընդհանրապես չի թույլատրվում: Հիմա պարետի թույլտվությամբ դա կարելի է միայն հավաքականի անդամներին: Մենք հավաքականների անդամների հետ աշխատում ենք, բայց ոչ լիարժեք: Չենք կարող հավաքական թիմը հավաքել մեկ տեղում: Նրանց հետ աշխատում ենք տարբեր վայրերում, ինչը արդյունավետ չէ: Տղաներն այնքան ուժային վարժություններ են արել, որ արդեն ոչ տատամին են զգում, ոչ գորգը, ոչ էլ մրցակցին»:
Արսեն Ջուլֆալակյանը տեղեկացրեց, որ ինքը միջազգային կոնֆերանսների մասնակցելիս հանդես է եկել ըմբշամարտին վերաբերող առաջարկներով, որը կարելի է տարածել կոնտակտային մյուս մարզաձեւերի վրա նույնպես: Եվ պարզվել է, որ իր առաջարկածին նմանվող ձեւաչափ համավարակի հենց առաջին օրերին արդեն կիրառել է Չինաստանը, իսկ ԱՄՆ-ի ֆեդերացիայի ներկայացուցիչը կարծիք է հայտնել, որ իր առաջարկը հնարավոր է՝ կիրառեն իրենց երկրում: «Դուք որպես ամեն մեկդ ձեր մարզաձեւի մասնագետներ, խնդրում եմ, ասեք՝ հնարավոր համարո՞ւմ եք իմ այս առաջարկը Հայաստանում կիրառել: Ես առաջարկում էի, որպեսզի բոլոր տարիքային խմբերի պրոֆեսիոնալ մարզիկներին՝ պատանիներ, երիտասարդներ, մեծահասակներ, նախապես թեստավորենք որեւէ մի կլինիկայում: Բացասական պատասխանների դեպքում նրանց մեկուսացնենք տարբեր մարզաբազաներում կամ հյուրանոցներում, որտեղ կա ֆիթնես: Այդպես նրանք լրիվ մեկուսացված կլինեն արտաքին աշխարհից, հանրության հետ շփումներից: Կշփվեն միայն իրար եւ բազայի կամ հյուրանոցի սպասարկող անձնակազմի հետ: Խոսքը փոքր հյուրանոցների մասին է, որտեղ կլինի ֆիթնես՝ դահլիճային պայմաններ ստեղծելու համար եւ լինի բնությանը մոտ՝ բացօթյա մարզվելու համար: Ըստ ձեզ, այս ձեւաչափը կարո՞ղ է կիրառվել ձեր մարզաձեւերում: Եթե այո, որքա՞ն արդյունավետ կլինի դա»,-հետաքրքրվեց Ջուլֆալակյանը:
Թաթուլ Հովհաննիսյանը պատասխանեց. «Ձյուդո, ըմբշամարտ, բռնցքամարտ, ծանրամարտ: Մենք հենց «Օլիմպավանում» կարող էինք նրանց մեկուսացնել: Ես զարմանում եմ, թե ինչի լողավազանները, որ անկախ ամեն ինչից միշտ էլ պարտադիր ախտահանվել են քլորով, պինդ փակել էին: Մի բան կասեմ. շատ ենք հետ ընկնում օլիմպիական խաղերից: Կրկնում եմ, «Օլիմպավանում» կարող ենք մենապայքարային մարզաձեւերի հավաքականներին, այն մարզիկներին, որոնք պատրաստվում են օլիմպիական խաղերին, մեկուսացնել: Ես զարմանում եմ, որ հիմա էլ դոպինգ սպաներ են գալիս մեր մոտ: Եթե նրանք գալիս են, առողջապահության ներկայացուցիչներին էլ «Օլիմպավանում» կարող ենք տեղ հատկացնել: Թող մնան, հետեւեն պահանջների կատարմանը»:
Կարդացեք նաև
Մասնագետները տեղեկացրին, որ պարետի որոշումների մեջ բավականին շատ հակասություններ կան, որոնք թուլ չեն տալիս շատ բաներ հստակ հասկանալ: Բացի դա, ֆինանսական վճարումների առումով օրենքների հետ խնդիրներ կան, որ թույլ չեն տալիս տեղում աշխատանքը կազմակերպել, որպեսզի այդ առաջարկից հավաքականները օգտվեն:
Արսեն Ջուլֆալակյանն ասաց, որ պարետը փորձում է լավ բան անել: Բայց քանի որ թերի խորհուրդ է տրված, թե ինչպես կարգավորումն անել, արդեն չի աշխատում: «Ինքս այս հարցով անձամբ խոսել եմ Տիգրան Ավինյանի հետ: Նա չի իմացել, որ կա նման խնդիր: Եվ այստեղ հարց է առաջանում, թե ով է կոնկրետ սպորտի հարցով խորհուրդները տալիս, որ լուծումները թերի են ստացվում: Պարետի մոտ տպավորություն է եղել, թե հարցերը լուծված են, խնդիր չկա եւ մարզվում ենք: Երբ չգիտես որ խնդիր կա, չես աշխատում այդ խնդիրները լուծել»,-ասաց պատգամավոր Արսեն Ջուլֆալակյանը:
Աշոտ ՀԱԿՈԲՅԱՆ
