Հունիսի 17-ին Եվրոպայի Ժողովրդական կուսակցությունը հյուրընկալել է Արևելյան գործընկերության առաջնորդների հանդիպումը՝ տեսակոնֆերանսի ձևաչափով: ԵԺԿ մի շարք պետություններ և կառավարություններ, ինչպես նաև ԵՄ անդամ պետությունների և ԱլԳ երկրների կուսակցությունների ղեկավարներ: Այս մասին ասվում է ԵԺԿ-ի տարածած պաշտոնական հաղորդագրության մեջ:
Անդրադառնալով Արևելյան գործընկերության երկրներում տիրող վիճակին՝ ԵԺԿ-ն փաստում է, որ շարունակելու է խթանել ԵՄ-Հայաստան հարաբերությունները Համապարփակ և ընդլայնված գործընկերության համաձայնագրի շրջանակներում՝ կիրառելով քաղաքական կամք ՝ համաձայնագրի ամբողջական վավերացման և իրականացման համար: Ըստ հաղորդագրության՝ Հայաստանում ժողովրդավարությունը հետընթաց է ապրում: «Հայաստանի իշխանություններին կոչ ենք անում զերծ մնալ ընդդիմության վրա ճնշում գործադրելուց»,-ասվում է հաղորդագրության մեջ:
Ինչ վերաբերում է Արևելյան գործընկերության մյուս երկրներին, ապա ԵԺԿ-ն ողջունել է մարտի 8-ին Վրաստանի Կառավարության և ընդդիմության միջև կնքված համաձայնագիրը ՝ միտված լարվածության նվազեցմանը և կոչ է արել ազատ արձակել Գիորգի Ռուրուային: Բացի այդ ԵԺԿ-ն Բելառուսի նախագահ Ալեքսանդր Լուկաշենկոյին կոչ է արել դադարեցնել ընդդիմության նկատմամբ բռնաճնշումները, ինչպես նաև ազատել արձակել բոլոր քաղբանտարկյալներին:
Կուսակցությունը մտահոգված է Ուկրաինայի նախագահ Պյոտր Պորոշենկոյի դեմ հարուցված քաղաքական գործերով: Հաղորդագրության մեջ նշվում է, որ քաղաքական դրդապատճառ ունեցող բոլոր դեպքերն անընդունելի են և ամոթալի նույնիսկ ժողովրդավար ճանապարհով ընտրված կառավարությունների համար: Միևնույն ժամանակ ԵԺԿ-ն հայտարարել է, որ Ուկրաինան չպետք է բաց թողնի բարեփոխումների օրակարգին հավատարիմ մնալու հնարավորությունը, իսկ կուսակցությունը կաջակցի երկրին այս հարցում:
Կարդացեք նաև
ԵԺԿ-ն հետևելու է նաև Մոլդովայում կայանալիք ընտրություններին,երկրի համար ազատ և արդար ընտրությունները բացարձակ առաջնահերթություն են՝ ասվում է հաղորդագրությունում:
Նշենք, որ ԵԺԿ նախագահը Դոնալդ Տուսկն է, իսկ Հայաստանից հանդիպմանը մասնակցել են Րաֆֆի Հովաննիսյանը և Սերժ Սարգսյանը:
Պատրաստեց՝ Վիկտորյա ԱՆԴՐԵԱՍՅԱՆԸ
