Շվեդիայի կառավարությունը ստեղծել է հանձնաժողով, որը գնահատելու է կորոնավիրուսի դեմ պայքարի շրջանակներում ձեռնարկված միջոցառումների արդյունավետությունը: Այս մասին հայտարարել է երկրի վարչապետ Ստեֆան Լյովենը: Նման հանձնաժողով ստեղծելու պահանջով հանդես է եկել ընդդիմությունը: Ակնկալվում է, որ հանձնաժողովը համավարակի դեմ պայքարի արդյունավետության մասին ամբողջական զեկույցը կներկայացնի 2022թ.:
Պաշտպանական հետազոտությունների շվեդական գործակալությունը՝ FOI, ավելի վաղ հրապարակել էր զեկույց՝ համավարակի ժամանակ իշխանությունների գործողությունների մասին: Զեկույցի համաձայն` երկիրը բավականաչափ պատրաստ չի եղել կորոնավիրուսի բռնկմանը: Բացի այդ պարզվել է, որ Շվեդիայում պաշտպանական միջոցների, բժշկական սարքավորումների պակաս է եղել: Զեկույցի հեղինակների կարծիքով՝ համավարակը բացահայտեց երկրում հակաճգնաժամային մենեջմենթի թուլությունը:
Շվեդիան Եվրամիության միակ երկիրն է, որը ինքնամեկուսացման ռեժիմ, ինչպես նաև խիստ սահմանափակումներ չի կիրառել: Պաշտոնական տվյալներով՝ երկրում վարակվել է շուրջ 70 հազար մարդ, մահացել՝ ավելի քան 5 հազարը:
Պատրաստեց՝ Վիկտորյա ԱՆԴՐԵԱՍՅԱՆԸ
